Durano: Pasayloa ako kay wala ako’y sala

HUMAN sa lakang sa buhatan sa Visayas Ombudsman sa pag upgrade sa fact-finding inquiry ngadto na sa preliminary investigation pinasubay sa anonymous complaint nga gisang-at niadtong 2008 labot sa pagpalit sa kagamhanan sa Probinsya og P98 milyunes sa 24 hektaryas nga Balili beach property sa Tinaan, Naga.

Dali nga nakapangandak ang atong gobernadora nga si Gwendolyn Garcia nga andam siya sa tanang higayon sa pag-atubang sa bisan unsang sumbong o asunto nga ibato batok kanila tungod sa maong transaksyon kay kini maghatag man og patas nga kahigayunan sa hingpit nga pagpatim-aw sa kamatuoran. Iya usab nga gitataw nga “bisan og wala pay kaso apan aduna nay gipangtrangkaso ang mga utok sa gihimong interpretasyon sa nabasang report”.

Gani tungod niini mitumaw na usab ang naandang kinaiya sa pagpahimangno sa tanang mga sakop sa Cebu media nga magbantay sa himuong pagpanaway ug pagtuki ning maong kumplikadong kalambuan. Sama sa pagmantala sa pulong nga “liable” kun manubag na sa  pasangil nga gipasaka. Nga gani ang estado sa kaso, anaa pa man sa hut-ong sa fact-finding unya lahap ra kaayo ang paggamit sa maong pulong kay kini magpintal naman sa huna-huna sa katawhan nga sila nahukman na nga sad-an. Tungod niini, aron kadepensahan ang ilang pangan, bansagon ug kadunganan, gipatun-an na karon ang pagpasaka og sumbong libelo sa mga malapason.

Apan diha ning maong kaisug nagpataliwa ang dakong tanghaga kay mao may unang gipanghimug-atan ang depensa nga nagawi sa Arias Doctrine nga dili trabaho sa local chief executive ang paghimo og actual site inspection arun kadepensehan ang kuwarta sa mga magbubuhis kay kini obligasyon man sa appraisal committee ug technical working group.

Gani sa iyang bahin si kanhi Provincial Board Member Juan Bolo nga maoy gidakdakan sa tanang kasal-anan ang mikumpisal sa tulumanong Alagad sa DYRF Radyo Fuerza, 1215 Khz AM nga iya lamang nga gilihok ang maong transaksyon kay personal man siyang gimanduan sa gobernador sa pagbuhat niini.
 
Ang lisod sabton kay human sa “mea culpa” ug pagpanglimpyo sa bisan unsang kalambigitan, apil na ang pag-uli sa dapit nga katunggan, karon mao na usa’y gipadak-an nga dili tinuod nga walay pulos ang maong luna kay bisan pa og ang dakong pahat niini ang naglutaw sa tubig sa dagat, apan aduna na kini’y kita nga gikatampo sa panudlanan sa Kapitolyo nga mikantidad og 500 mil dolyares nga makumpleto unya ngadto sa usa ka milyon sa pagsugod na sa operasyon sa pagpamasura sa coal ash gikan sa Kepco-SPC.

Gipun-an pa sa karga nga nakaganansya pa man gani ang Probinsya kay ang orihinal nga presyo P600 matag metro kwadrado apan tungod kay diniyos nga paningkamut, nakadaginot pa ang Kapitolyo kay nahimo namang tag P400 ang katapusang presyo matag metro kwadrado. Pwerte man diay untang ganansyaha, unya nganong giuli pa man ang katunggan?