Editoryal: Silot sa pulis

NAKATILAW gyud og medyo bug-at nga silot ang duha ka mga pulis sa lungsod sa Cordova nga nasakpan ni Chief Supt. Ager Ontog kay di sila makadawat og suweldo tumbas sa 10 ka adlaw ug bonus.

Silot kini nga tukma kaayo sa ilang dakong kalapasan nga nahimo samtang nag-duty. Di gyud angay buhaton sa usa ka pulis ang pagkatulog samtang nag-duty kay iyang gimbuhaton ang pagtubag sa mga alarma.

Mag-unsa na man lang ang publiko kon dunay mga krimen nga mahitabo kon ang mga pulis nga mag-duty magnga-nga samtang naghagok kay nahinanok sa pagkatulog?

Kon nahitabo kini sa Cordova nga naa sa Metro Cebu, unsa na kaha ang hilit nga mga dapit, sama sa mga lungsod nga naa sa isla?

Naa kahay pulis nga nagbantay? Di kaha gibiyaan ang police station kay niuli ang pulis sa ilang balay ug gipabantayan ang police station sa piniriso.

Duna nay mga hitabo nga gitawgan sa mga tigbalita ang pipila ka mga police station sa mga lungsod nga ang nanubag mao ang piniriso nga mao ray nahabilin sa buhatan.

Malikayan tingali kini kon ang mga hepe mismo sa mao nga buhatan estriktong mopatuman sa policy nga di biyaan ang buhatan. Siya mismo mao ang ehemplo ug modelo aron sundon sa iyang ginsakpan.

Unya pahamtangan og bug-at nga silot ang pulis nga masakpan. Di lang ang pulis nga nasakpan maoy manubag, kon di ang hepe mismo.

Dako man gud ang posibilidad nga ang hepe nasayod niini apan wa lang magpakabana. Busa aron sab siya magkinto, mas maayong iapil ang iyang liog kon duna may silot nga ipahamtang.

Kini bayang buhata usa ka pagtraydor sa pagsalig sa publiko nga naglaom nga naa kanunay ang kapulisan nagbantay sa kaluwasan, mopatunhay sa kahusay ug kalinaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph