Espinoza: Makiha kaha si Gobernador Gwen?

KULBA-HINAM. Miabot na ang dugay nang gihuwat sa kadaghanan sa mga Sugboanon labina sa mga kritiko ug kontra sa pulitika ni Gob. Gwen Garcia. Apan makiha ba gyud si Gobernador Gwen og korapsyon sa pagpalit sa yuta ni Balili?

Ang Ombudsman mihukom na nga ang reklamo batok ni Gob. Gwen, Bise Gob. Greg Sanchez ug sa mga bokal sa pagpalit sa Probinsya sa yuta ni Balili diha sa Naga city nga naumod sa dagat usa na ka kasong kriminal.

Matod pa sa evaluation report ni Graft Prevention and Control Officer Roderick Blazo nga angay pasakaan og sumbong kriminal ang gobernador tungod sa pagpalit sa yuta ni Balili nga di makapahimulos ang Probinsya. Nakasupak kini sa Section 3(g), RA 3019 o Anti-Graft and Corrupt Practices Act.

Abtik nga midepensa si Atty. Jong Sepulveda, tigpamaba ni Gobernador Gwen, nga gipatugbaw lang ang maong reklamo nga usa na ka kasong kriminal aron dunay preliminary investigation.

Si Atty. Sepuvida miingon nga ang pag upgrade sa sumbong ngadto sa kasong kriminal mahatagan og kahigayonan si Gobernador ug ubang opisyales sa Kapitolyo sa pagtubag sa maong sumbong.

Dako’g pagasalig si Sepulveda nga di makiha ang gobernador sa kontrobersyal nga palit sa yuta ni Balili sa kantidad nga P99 milyunes. Wa hinuon siya moingon kinsa sa opisyales sa Kapitolyo ang maduot unya sa maong transaksyon.

Mirekomendar si Blazo nga pasakaan og sumbong kriminal nga gross inexcusable neglect ang gobernador, bise gobernador and 12 ka bokal tungod kay way feasibility study ug wa gisuta ang lokasyon sa yuta bisan sa kadaku sa presyo niini.

Matod pa sa report ni Blazo nga si Gobernador misuway sa pagdeterminar sa presyo sa yuta apan iyang gibaliwa ang lokasyon sa maong yuta. Ang gobernadora mas nabalaka sa palit o presyo sa yuta kay sa hitsura sa yuta.

Apan swerte pa gihapon ang maong mga piniling opisayles sa Kapitolyo tungod sa miaging piliay kay kadtong nasublian di na makiha sa kasong administratibo tungod sa giingon nga Aguinaldo doctrine.

Ang mga bokal niadtong 2008 sa dayong ulbo sa isyu nga mahal ang pagpalit sa
yuta ni Balili tungod kay ang kinatibuk-an sa yuta naumog man sa dagat mao sila si Juan Bolo, Agnes Magpale, Victor Maambong, Peter Calderon, Julian Daan, Wildredo Caminero, Jose Gastardo, Rosemarie Durano, Joven Mondigo, Jr., Wenceslao Gakit, Alfred Francis Ouano, Teresita Celis and Bea Mercede Calderon.

Si kaniadto Bokal Bolo pasakaan og sumbong sa pakigkunsabo sa pagpalit sa maong yuta nga klasifikado nga “timberland” uban nila ni Anthony Sususco, Roy Salubre ug Eulogio Pelayre, ang nagsakop sa appraisal committee; Mariflor Vero, Michelle Languido, Roger Dumayac, ug Pilar Yburan, ang technical working group; Amparo Balili, ang tag-iya sa yuta, ug si Abogado Romeo Balili.

Gi-review ni Assistant Ombudsman Virginia Santiago ang report ni Blazo ug giaprobahan ni Deputy Ombudsman Pelagio Apostol ug Ombudsman Merceditas Gutierrez niadtong Sept. 27, 2010.

Tungod sa bolilyaso, ang Kapitolyo mipasakag sumbong batok kang Balili nga iuli ang nabayad nga P37.8 milyunes sa 80,124 kwadrado metros nga yuta nga naumod sa dagat ug 14,402 kwadrado metros nga katunggan.

Atong mahinumduman nga ang Probinsya mi-isyu sa unang cheke agig bayad sa yuta ni Balili niadtong Abril 28, 2008 sa kantidad nga P49,849,200. Ang dokumento sa palit gibuhat niadtong June 11, 2008 pabor sa probinsya.

Gihatagan ni Blazo og dakong importansya sa iyang evaluation report ang wa pagpakabana sa mga opisyal sa Kapitolyo sa kondisyon sa yuta nga naumod sa tubig-dagat ug nasulod sa katunggan.

Apan makiha ba gyud si Gobernador Gwen? Gipaunahan na ni Sepulveda nga di gyud makiha ang goberandora og kasong korapsyon. Gawas pa niini, ang iyang amahan, si Kongresista Pablo, maayong laking abogado, ingon man ang iyang manghod nga si Kongresita Pablo John abogado usab.

Usa ka kulba-himan nga isyu nga angay nga atong huwaton ang resulta sa preliminary investigation unya sa Ombudsman.

(elespinoza53@yahoo.com)