Mongaya: Nasuko

MASUK-ANON si Presidente Noynoy Aquino, matod pa sa mga taho, nga nireklamo didto sa tigum sa mga lider sa Asia-Pacific Economic Cooperation (Apec) sa Japan kabahin sa mga travel advisory batok sa Pilipinas nga giisyo sa pipila ka mga nasud.

Samtang naghisgot sila og kooperasyon ug pagtinabangay didto sa Apec, kining maong mga advisory nagpakgang sa atong paninguha nga molambo ang atong turismo.

Bitaw, daghan na ang mga turista nga mobisita dinhi sa Pilipinas. Moabot na gud kita og tres milyones matag tuig. Apan kon itandi sa ubang mga nasud sa Apec, layo ra kaayo kita.

Nakahibawo na man kita nga ang mga dolyar nga igasto sa mga turista dinhi sa atong nasud dako kaayong tabang alang sa atong ekonomiya. Kining mga dolyar makatabang sa atong mga negusyante ug mga mamumuo.

Gani, makatabang sab kini sa mga kabus sama sa mga drayber sa taxi, kining mga namaligya og mga ginagmayng fashion accessories sama sa mga ponseras diha sa kadalanan, lakip na ang atong mga ginagmayng kan-anan.

Nakabantay man ta nga kining mga turista di man lang anha magpundok sa mga inila ug mahalong mga kan-anan. Daghan baya kong makit-an nga mga langyaw nga mangaon dinha mismo sa Larsian sa Fuente Osmena kay gusto motilaw sa atong barbecue ug moinom og daghang beer nga barato.

Apan makabaraw sa atong tinguha ang ingon niining mga travel advisory.

Sa laing bahin, angayan sab nga tarungon nato ang atong pagtagad sa mga bisita nga langyaw.

Di man malimod nga pipila sa atong mga drayber sa taxi, pananglit, mobunal dayon kon makatayming og mga langyaw nga wa masweto sa atong dapit ug mga pamaagi. Duna say mga negusyante nga ingon niinig pagtan-aw sa mga langyaw mao nga daghan na hinuon ang matagam.

Pagkapait ra ba niining matagam kay manabi dayon inig balik sa ilang mga nasud. Bisan unsaon pa sa pagpangasaba ni Pnoy didto sa Apec, kining natagam sa Pilipinas di na gyud gusto nga mamalik.

Dako sab kaayog papel ang pagtarong sa atong mga tigbalantay sa kalinaw nga maninguha nga mokunhod gyud ang mga krimen dinhi sa atong nasud. Ug di igo ang gibuhat sa miaging pipila ka tuig nga gipang-salvage ang mga ginagmayng kriminal kay di man gyud epektibo. Hay, kon epektibo pa, nganong daghan man gihapon ang mga krimen?

MANNY

Maayo unta kon permi mag-boksing si Kong. Manny Pacquiao kay mokalit lang sa pagkunhod sa krimen sa tibuok nasod kay moapil man sab ang mga kriminal sa pagtan-aw sa atong pambansang kamao.

Sama karong buntag, daw mamingaw sa pagkalit ang tibuok nasud kay di gusto mobiya sa telebisyon kitang tanan.

Gusto kitang motan-aw kang Pacman nga momakmak ug mopatikay-ang sa Mexicano nga si Antonio Margarito.

Bisan pa man og nagtuo gyud ko nga modaog sa Pacquiao, ang akong masulti sa pagkakaron mao: Good Luck Manny!