NAGLIBOG gyud ko nganong nahimong isyo ang kalimpyo niining mga frozen meat nga gikan sa Uropa, Estados Unidos, Canada, ug Australia.
Sa akong nahibaw-an man gud, estrikto kaayo ang pag-siguro sa safety standards didto sa maong mga nasud ug apil sa ilang paagi mao kining cold-chain process.
Di man tinuod ang mga istorya nga sa China naggikan ang maong mga karne kay nagkinahanglan man gani kini sila og dugang mga supply.
Ug kining pag-frozen sa mga karne maoy labing siguro nga paagi sa pag-inat sa shelf life sa mga karne. Gani, wa gyuy hugaw nga mga kamot nga mogunit sa maong mga karne gikan sa pag-ihaw ngadto na sa pagbutang sa bodega nga murag freezer.
Apil na ang mga van nga sudlan sa maong mga karne frozen.
Di makasanay ang kagaw, kon duna may makapasar sa ilang swab test.
Inig abot sa Pilipinas, moagi pa gyud kini sa Bureau of Animal Inspection, sa Quarantine, ug sa atong mga meat inspectors.
WAY COLD CHAIN
Kon buot hunahunaon, dugay na nagplano og cold chain process dinhi sa atua aron mosaka sab ang atong standard.
Apan wa gyud kini mabuhat sa atong mga opisyal.
Busa hangtod karon, gawas sa mga hugaw nga mga ihawan diin nagbuy-od lang mga karne sa sawog tupad og kanal, pas-anon pa kini sa mga mangingihaw, isakay og mga trak o tricycle nga abli sa mga abog.
Wa pay klaro ang mga tubig nga gihugas sa mga karne. Inig abot sa mga merkado, itambak lang sab kini dayon.
Kon ato lagi nga tukion ug itandi, layo ra gyud ang atong mga karne ikomparar sa mga imported nga frozen nga isakay pa sa mga sirado ug closed nga mga trak.
LIPAT-LIPAT
Sa akong pagsabot sa nahitabo, murag nangita lang og maisyo ang mga opisyal nga gitahasan sa pagsiguro nga luwas ang mga karne nga atong gipangkaon aron malikayan nga sila na hinuon ang maisyo.
Nahadlok sab ang mga lokal nga tig-supply og karne kay moguwa man nga mas barato ang imported ug mas dugay madaot.
Alang kanako, mas maayo gyud kon gamiton sa mga lokal nga supplier kining maong kahimtang nga dunay mas barato ug luwas nga alternatibo alang sa mga konsumidor aron ma-improve ang atong sistema sa atua.
Panahon na karon nga ang mga plano kaniadto pa nga magtukod og inprastruktura alang sa cold-chain himuon na aron makasukol kita sa mga imported kon presyo ug kaluwasan sa panglawas ang atong hisgutan.
Undangon na unta kining ilang kayabag nga pangitaan og isyo ang mga imported ug magpakabuta sa kahimtang sa atong lokal nga industriya.