Nadela: Tabangan nato si Romeo

TUNGOD sa haylo sa dakong oportunidad sa pagpanrabaho sa Estados Unidos, misulbong pagmaayo ang mga mikuha sa kursong Bachelor of Science in Nursing dinhi sa atong nasod kay lagi kini giisip man nga sayong kahigayunan sa pagsakmit og dolyares nga suhulan nga sarang makahaw-as sa kalisdanan.

Gani tungod sa mga success stories sa mga naka-una og pamundar sa Estados Unidos nga makita sa tinud-anay gyud nga mga kabtangan nga kayang pamaliton dinhi sa ato, daghang mga propesyunal ang nag-iyahay sa pagkuha sa kursong nursing isip ikaduhang kurso hangtod nga miabot pa sa punto nga hasta na ang mga doktor of medicine dinhi sa ato ang wa na maka-agwanta ug miapil pa sa pag-eskwela og nursing kay ang ilang kitaon sa ilang propesyon kapila man pilo-piloa kun adto sila makapangempleyo sa Amerika.

Apan kining maong gold rush sa kursong nursing sa Pilipinas dili exempted sa law of supply and demand. Sa dihang miabot na sa punto nga misobra na ang supply sa mga graduates labaw sa panginahanglan sa mga hospitals og caregiving facilities, sama sa garipo miundang na usab sa pag-agas ang tubig sa grasya alang sa atong mga malaumon nga mga nurses.

Unya bisan og daghan na ang mga gibuhiang mga mensahe kalabot ning maong problema nga sarang makapausab sa mga estudyante sa pagpangita na lamang unta og laing kurso. Apan ang kasagaran man gung kinaiya natong mga Pilipino mao ang pagbuhi sa paglaom nga sa paglabay sa kagabhion moabot da unya sa pagbalik ang kahayag sa kahigayunan alang ning maong propesyon.

Kini miresulta sa grabeng pagbaha sa mga nurses dinhi sa ato, diin kasagaran ang mapugos na lamang sa pag-utong sa under employment diha sa pagtrabaho sa mga call centers ug uban pa aron lang intawon adunay kapanginabuhian.

Apan uban ning maong kahimtang sa atong mga nurses mitumaw ang laing matang sa pagpanglupig sa mga balay tambalanan lukop nasod. Tungod kay nanginahanglan man og work experience ang mga bag-ong mipasar sa board exams aron sila makahigayon sa pagpanrabaho sa gawas sa nasod. Karon maoy gipatuman nga lagda sa mga mapahimuslanon ang pagpabayad sa mga nag OJT (on the job training).

Sobra kasalawayon kining maong pamaagi kay daan ng napahimuslan ang kahago sa libre nga trabaho unya wala’y madawat nga suweldo. Porbida, human gipatay-patay ang lawas sa pagtrabaho sa night shifts, ang mga bag-ong nurses mao pay obligado sa pagbayad sa tapos sa buwan ngadto sa management  ning maong mga tambalanang walay puangod. Unya kay lagi mao may nanginahanglan, kasagaran sa mga hingtungdan ang moduko na lamang ug mohilak sa tago ning maong mapait nga kamatuuran.

Gikinahanglan nga atong undangon kining mentalidad sa pagkapyot sa labaha unya atong sugdan ang pag-abli sa mas dako nga kahigayunan pinaagi sa panaghugpong sa tanang mga gipanglupigan aron matawag ang atensyun ning atong nagpagoryo-goryo nga panga-gamhanan. Dinhi ning maong baruganan, ako nanghinaut nga makat-on na unta sa pagbarog ang atong katawhan kay dili gyud mahitabong atong maangkon ang hustisya og kaangayan kon magpabilin kining atong pagkatalawan.