AKONG hatagan kining giingon sa iningles nga ‘benefit of the doubt’ ang mga piskal nga mirekomendar nga ibasura ang kaso batok nila ni Sven Erik Berger ug Karen Castro Esdrelon nga may kalambigitan sa niluog nga kamatayon sa 6 anyos nga bata nga si EllahJoy Pique. Nanghinaot lang ko nga walay laing rason nga nagpaluyo ug nagpahipi sa ilang pagsalindot sa kaso. Wala kaha sila ma-pressure sa usa ka pulitiko kinsa gipressure usab sa Norwegian Embassy?
Wala kaha sila mahadlok nga matangtangan sa ilang binuwan nga allowance gikan sa Kapitolyo? Pero unsa ka tinuod kining nakuha nakong inpormasyon nga niadtong adlaw nga gi-release sila Sven ug Karen, nagsaulog sila didto sa Crown Regency. Unya didto ang usa sa mga piskal nga miresulbar sa kaso? Makakab-ot pa kaha ug hustisya ang mga ginikanan ni Ellah Joy?
DRAMA SA RADYO
Morag mahinumdum man ako aning title sa atong lindog karon sa akong mga paboritong drama ug tulumanon sa radyo kaniadtong mga dekada 70. Sa DYDY kaniadto dihay drama nga ‘Ikaw, ako ug ang awit’. Unya pagkagabi, dihay balak program version ang maong tulumanon nga gidumala ni Roger ‘Patik’ Solante.
Sa DYHP, dugay na kanang drama nga ‘Handumanan sa usa ka awit’ nga gidumala niadto ni Susan Perez Alino. Apan karon gidumala na ni Ate Prescila ‘Precy’ Raganas. Aduna nay bag-ong version si Susan Alino karon sa DYSS, ang ‘From Susan with Love’ nga mabati matag 2:30 hangtod sa 3:00 matag hapon. Kasagaran sa ipadalang mga sugilanon kabahin sa gugma uban sa ilang paboritong awit.
IKATANDI SA USA KA AWIT
Kon atong itandi o hubaron kining kamatayon ni Ellah Joy Pique pinaagi sa usa ka awit mao kini ang angayan kantahon sa mga personalidad nga nahilambigit niini. Si Gob. Gwen Garcia nga nag-apil-apil sa trabaho sa pulis angay nga mokanta ug ‘Ako ang nagwagi’. Samtang sila si Sven ug Karen angay nga mokanta ug ‘Forgive and Forget’. Labi pa kay dili sila mokiha sa mga pulis nga nagdakop ug nagkiha kanila.
Samtang si S/Supt. Erson Digal angayan nga mokanta ug ‘Just once’ (I did my best but my best was not good enough). Kon magduet si Gwen ug Digal ang ilang kantahon mao ang akong paborito nga ‘Bakit ngayon ka lang’. Samtang ng mga ginikanan ni Ellah Joy mokanta na lang ug ‘Ihilak ko lang sa tago o ba kaha Nassan ang liwanag’. Samtang si Atty. Rory Jon Sepulveda angay’ng mokanta ug ‘Manoy, manoy, Boy Scout na ko manoy’.
(bobby@sunstar.com.ph)