Nalzaro: Maguindanao Massacre

PAGKADALI lang gyod modagan sa panahon. Usa naman diay ka tuig ang nakalabay human mahitabo ang duguong insidente nga diin 57 ka mga kinabuhi ang nakalas, 30 niini mga sakop sa media sa gitawag karon nga ‘Maguindanao Massacre’. Mga kabanay, asawa ug igsuon ni karon Maguindanao Governor Ismael ‘Toto” Mangudadatu, mga sakop sa media gikan sa General Santos ug Koronadal, South Cotabato ug inosenteng mga tawo ang namatay.

Ang utok sa maong linuog nga krimen mao si kanhi Maguindanao governor Andal Ampatuan, ingon man ang iyang anak nga si Datu Unsay Mayor Andal Ampatuan Jr. Ang mga Ampatuan ug Mangudadatu mao unta ang magribal sa pagkagobernador sa Maguindanao niadtong Mayo 10 nga eleksiyon. Gipamatay ang mga biktima sa dihang ningkuyog sila sa banay ni Toto Mangudadatu sa pag-file sa iyang certificate of candidacy. Wala hinuon makakuyog si Toto niadtong higayona kon dili ang iya rang asawa ug igsuon.

Diha pay milabay lang sa maong lugar diin giharang ang mga biktima ug gi-apil og pamatay.

GUBOT GIHAPON

Nahugno ang ang political dynasty sa mga Ampatuan human sa maong hitabo. Gisikop silang tanan ug nabilanggo hangtod karon. Ang mga Mangudadatu na usab ang nagkontrolar sa maong lalawigan human midaog si Toto pagkagobernador. Wala pa hinuon mapapas sa mapa sa pulitika ang mga Ampatuan kay aduna pa may mga lungsod karon sa Maguindanao nga sila gihapon ang naghari.

Ang Maguindanao usa sa pinakapobre nga lalawigan sa tibuok nasud. Dili kay pobre lang, gubot pa gyod gumikan sa magkaribal sa pulitika nga puro adunahan ug nagtinir og armadong mga tawo. Bisan ang militar ug kapulisan dili basta-basta makakontrolar sa mga gamhanang pulitiko. Bisan karon nga nahugno na ang mga Ampatuan padayon gihapon ang kasamok sa maong lalawigan gumikan usab sa presensiya sa Moro Islamic Liberation Front (MILF) nga nakig-away sa atong kagamhanan.  

HUSTISYA

Usa ka tuig na ang nakalabay human sa maong hitabo. Apan karong bag-o pa lang napasaka ang kaso batok sa mga Ampatuan. Karong Disyembre pa sugdan ang husay. Gumikan sa kahinay nga motuyok sa ligid sa atong hustisya, gikabalak-an nga molanat pa og pipila ka tuig usa makakab-ot og husitisya ang mga kabanay sa mga baktima.

Nagkanayon man gani si Senador Joker Arroyo nga posibling modagan pa og 200 ka tuig usa matapos ang kaso. Sus, pastilan no? Kinsa pa may silutan kon mangamatay nang tanan? Madugay gyod kini kay daghan kaayo ang mga akusado ug daghan ang mga saksi.

Unya hatagan man kini silang tanan og due process. Pagkapait kon mao kini ang mahitabo.

(bobby@sunstar.com.ph)