Wagas mihangyong makauli, makapa check up sa `sakit’

KASAMTANGANG nakalingkawas sa pagkabilanggo si kanhi Compostela mayor Gilbert Wagas sa Muntinlupa human siya gitugtan sa korte nganhi sa Sugbo nga masud sa tambalanan ug makabisita sa iyang pamilya atol sa Kalag-Kalag.

Si Wagas niadto sa sala ni Regional Trial Court (RTC) Judge Douglas Marigomen kagahapon sa buntag aron pangayuon ang permiso niini sa korte.

Buot sa kanhi mayor nga masud siya sa tambalanan aron masusi ang iyang sakit nga diabetes ug high blood pressure unya makauli sa Compostela aron mabisita niya ang iyang kabanay atol sa pagsaulog sa Adlaw sa Patay ug Kalag.

Niini, si Marigomen nihatag sa gipangayo ni Wagas nga gihulagway niyang “humanitarian reason” ang iyang pagsanong sa hangyo.

Matod sa huwes nga sugod kagahapon hangtod sa Nobyembre 2 maka-estar ang kanhi mayor sa Sugbo.

Apan, nipahibawo ang siya nga gikinahanglang kanunay nga kuyog ni Wagas ang iyang mga bantay.

Giklaro lang ni Marigomen nga di unta siya ang angay nga mohatag og permiso ni Wagas kay di man siya ang nagpapriso niini.

Gipahibawo niya nga ang giatubang nga kaso ni Wagas nga libel sa iyang sala nakapiyansa man siya niini.

Si Wagas gipasakahan og kasong libel ni Cebu Vice Gov. Gregorio Sanchez tungod sa giingong di makiangayong pangatake niini sa iyang programa nga “Wagas ug Gawasnon” sa dyXR. Si Wagas blocktimer sa sibyaanan niadtong higayuna.

Di lang si Wagas ang nag-atubang sa kaso apan gilakip usab ang kanhi station manager sa dyXR nga si Carlo Dugaduga nga karon gawasnon usab human nakapiyansa.

Si Dugaduga nabalhog og makadiyot sa Talisay Police Station.

Ning higayona, si Wagas gitanggong sa National Bureau of Corrections didto sa Muntinlupa tungod sa kasong malversation of public funds nga ang Sandiganbayan maoy nagkombikto kaniya.