Niños pilde na sab

USA na lang ka daog ang kuwang og makakulit na’g kasaysayan ang Misamis Oriental (MisOr) Meteors isip labing unang kampiyon sa Tournament of the Philippines (TOP), hiniusang giorganisar sa Liga Pilipinas ug Philippine Basketball League.

Atubangan sa ilang mga dumadapig, ang host Meteors ni coach Jun Noel ninglupig pagbalik sa M.Lhuillier Kwarta Padala-Cebu Niños, 75-71, sa Game 3 aron pagkulit og 2-1 nga bintaha sa best-of-five championship series sa Xavier University Gym sa Cagayan de Oro City.

Updates on President Benigno Aquino III's presidency

Sama sa naandan, ang Meteors gipangulohan na sab sa ilang tirador nga si Patrick Cabahug, kinsa nipugnit og 23 puntos samtang si Reed Juntilla niamot og 19 puntos lakip na niini ang katapusang lima ka puntos sa Meteors.

“If there is a formula for a sure win I would gladly use it,” matod ni coach Noel.

“But credit should go to the players because they showed their heart and courage as they never lost their confidence despite a big rally by Cebu.”

Si Cabahug, kinsa kanhi scoring champion sa UAAP dihang nagduwa pa siya sa Adamson, nimugna og krusyal kaayo nga puntos nga maoy nakapalabaw pagbalik sa Meteors sa hinapos nga bahin.

Unya human niadto, si Juntilla na ang midala sa opensa sa Meteors aron hatagan ang iyang team og 73-69 nga labaw sa himatyong segundos.

Nakamugna unta og 12 puntos nga labaw ang Meteors apan ningpabuto og 16-2 nga rally ang Niños ni coach Raul “Yayoy” Alcoseba aron ilugon ang labaw, 66-64, sa nahabiling 5:48 minutos.

Kulbahinam na gyud kaayo ang duwa gikan niadto hangtod nga nidiskarte na sila si Cabahug ug Juntilla aron padag-on ang Meteors.

Puntos kada usa

MisOr (75)- Cabahug 23, Juntilla 19, Daa 8, Raneses 7, Andaya 6, Misa 2, Moreno, 2 Saldua 2, Lamocha 2, Reguera 2.

MLKP-Cebu (71)- Padilla 16, Mepana 12, Dacia 8, Baguion 8, Cruz 6, Saladaga 6, Basco 5, Magsumbol 4 Santos 2, Ababon 2, Ybanez 2.