Pacquiao pakan-on og maayo aron modako

TINGUHA ni conditioning coach Alex Ariza nga pakan-on gyud niya’g insakto si pound-for-pound champion Manny Pacquiao aron makagukod kini sa gidak-on sa iyang umaabot nga kontra nga si Mexican Antonio Margarito.

Mag-away sila si Pacquiao ug Margarito karong Nobiyembre 13 sa Dallas Cowboys Stadium.

Updates on President Benigno Aquino III's presidency

“He has to eat 7,000 calories more a day,” matod ni Ariza sa interbyu sa www.abs-cbnnews.com.

Si Ariza maoy nag-atiman kang Pacquiao aron makasaka ang Pinoy boxing superstar og daghang weight categories nga wala gyu’y nausab sa kaabtik niini.

Sa kasamtangan, si Pacquiao napatik sa kasaysayan isip kampiyon sa pito ka managlahing weight categories.

Gipasabot ni Ariza nga kinahanglan gyung madugangan ang gidak-on ni Pacquiao aron makasustiner kini sa kusog ni Margarito, kinsa dako gyud kayo kumpara sa Pambansang Kamao sa Pilipinas.

“We have to build a stronger and denser body to be able to handle the kind of power that Margarito has,” pasabot ni Ariza.

Si Margarito (38-6, 27KOs) adunay gitas-on nga 5’11” samtang si Pacquiao (51-3-2, 38 KOs) aduna lay gitas-on nga 5’6½”.

Masaligon si Ariza nga bisa’g modako ug mobug-at si Pacquiao, dili gyud gihapon ang kaabtik niini.

“In a case like this, you know, Manny’s still gonna have his speed and retain a lot of his strength,” dugang niya.

Sa sayo pa, si American trainer Freddie Roach nagkanayon nga kinahanglang dili molapas og 151 pounds si Pacquiao atol sa away aron dili mawala ang kaabtik niini.