1 giluba, 1 gitigbas

WA NA madala sa tambalanan ang usa ka ulitawo sanglit patay na siya dihang miabot ang mga paramedics sa Central 911 human giluba sa wa mailhing tawo nga nagsakay og motorsiklo sa alas 9:45 sa gabii niadtong Sabado.

Gihaya karon sa Collado Funeral Homes mao si Adonis Perito, alyas Payok, 19, construction worker ug nagpuyo sa Crossing Shanghai, Barangay Matina Aplaya, siyudad sa Davao.

Si Perito nakaangkon og daghang mga samad sa iyang kalawasan human siya giluba sa usa ka tawo nga gilarawan lamang nga tambukon ang lawas, tul-id ang buhok, ug nagsul-ob og puti nga t-shirt ug short pants.

Mga molupyo sa maong lugar nagbutyag nga nagduwa ang biktima sa computer number 16 sud sa Mega Net Cafe, apan kalit siyang giduol sa mamumuno dayon giluba makausa ka higayon, sigun sa imbestigasyon ni PO2 Ronald Baguio sa Talomo Police Station.

Ang biktima, suma ni Baguio sa iyang spot report, nakahimo pagdagan paingon sa gawas, apan gigukod siya sa mamumuno ug naabtan atubangan sa Darwin Roadside Bakery.

Didto na gihansakan sa makadaghan nga higayon ang biktima hangtud nga natumba sa yuta, samtang ang mamumuno daling misakay sa usa ka motorsiklo nga way plate number ug gimaneho sa laing tawo.

Gisusi karon sa kapulisan ang tanang anggulo sa maong hitabo aron duna silay matumbok nga tawo nga maoy mipatay sa biktima.

Sa laing bahin, laing usa ka batan-ong lalaki ang gitigbas sab samtang nagduwa og computer games sa alas 9:30 sa gabii niadtong Sabado didto sa Roman Diaz Street, Calinan, ning siyudad.

Ang biktima nga gitambalan karon sa Southern Philippines Medical Center (SPMC) mao si Melvin Manatas, 17, nagpuyo sa Purok 5, Kalye Apeki, Calinan.

Si Manatas giingon nga malipayong nagduwa og computer sud sa Pongs Computer Games and Amusement apan iyang gikalalis ang suspetsado nga si Rapax Cabrita, nagpuyo sa Bayanihan, Wangan, Calinan.

Tungod sa ilang panaglalis, mikuha og sundang ang suspetsado dayon gitigbas ang biktima sa iyang ulo ug dughan mao nga gidala siya didto sa Calinan General Hospital.

Sanglit grabe ang kahimtang sa biktima, gibalhin siya didto sa SPMC samtang ang suspek gipangita na sa mga sakop sa Calinan Police Station. (AD)