2 gipusil sa Davao Sur, 1 patay

USA ka lalaki patay, samtang laing usa ang samdan sa sagunson nga pagpamusil sa managlahi nga dapit sa lungsod sa Magsaysay, Davao del Sur.

Unang gipusil banda alas 7:30 ang takna sa miaging gabii mao si Lolito Catiawan, hingkod ang pangedaron, mag-uuma didto sa Purok 1, Barangay Maibo. Nahiagom ang biktima og lima ka mga samad pinusilan sa nagkadaiyang parte sa iyang lawas apan buhi pa kini sa dihang gidala sa Davao del Sur Provincial Hospital.

Di pa masuta sa kapulisan ang kalibre sa armas nga gigamit sa pagpamusil kaniya apan nailhan nila ang suspek nga usa ka Joy Casinillo, hamtong ang pangedaron ug molupyo gihapon sa maong dapit.

Samtang sa laing bahin, laing lalaki ang gipusil sab didto sa Barangay Malawanit sa maong lungsod nianang pagka-alas 9 sa gabii. Ang biktima giila nga mao si Janrel Benavinte, 21, kinsa hikabsan gilayon sa kinabuhi human maigo sa tiyan, walang bahin sa dughan ug liog.

Si PO2 Ian Roy Ildefonso nagkanayon nga wa sila masayod sa mga motibo sa pagpusil sa duha ka mga biktima apan mihimo pa sila og dugang imbestigasyon sa maong hitabo. (Dondon Dinoy)