Pamilya sa 3 anyos nagpakitabang

NAGPAKITABANG karon ang pamilya sa usa ka tres anyos nga batang babaye nga masignit ang suspek nga miamung-among sa ilang anak, Agosto 15 sa nakalabay nga tuig.

Si Mariz (di tinuod nga ngalan), inahan sa biktima nga taga Brgy. Pampanga ning siyudad nangayo'g tabang ngadto sa publiko nga tabangan silang makita ang suspek nga si Rogelio Caayohan Desoyo, alyas Boboy/Boyaks, hamtong ang panuigon nga molupyo sab sa maong lugar.

Enero 11, ning kasamtangang tuig gipagawas ang warrant of arrest gikan sa sala ni Judge Salvador M. Ibarreta Jr., sa Regional Trial Court 11th judicial region, Branch 8 ning siyudad aron dakpon na ang suspetsado.

Sa pagpanubay sa Superbalita ug dxRA Radyo Arangkada nasayran nga Agosto 15 sa nakalabay nga tuig nahitabo ang pagpanglugos sa tres anyos nga si Nene.

Sumala pa sa saysay sa inahan nga buntag kadto sa maong petsa dihang kalit nga nahanaw ang iyang anak.

"Akoa to nga gipaliguan sa iyang ate. Kalit lang man siya nawala unya sa sige namo'g tawag nakita namo siya nigawas wala na siyay shorts. Amoa nga gipangutana unya mao na to iyang gisulti sa hitabo," sigun sa inahan nga si alyas Mariz.

Sumala pa nga silingan lamang sa biktima ang suspek, diin tupad lamang nila kini og panimalay.

Ang suspetsado nga si Desoyo nagtrabaho sa usa ka autoshop, lumad nga taga probinsiya sa Polomolok South Cotabato ang na-priso sud sa siyam ka adlaw human sa hitabo apan tungod wala pay warrant of arrest gipaguwa ra sab siya sa kapulisan.

"Nagpaabot pa man gud mi sa warrant so wala pa man mao to ang pulis gipagawas siya. Pero mao pud lagi human siya makagawas wala na sab siya igkita, dili na gyud siya ma-locate namo," dugang sa kabanay sa biktima.

Dugang taho nga nahagpat nasayran nga si Desoyo mao sab ang suspek sa pag-molestiya sa dos anyos nga anak sa iyang higala.

Naunang gilimod ni Desoyo nga iyang gi-molestiya ang bata apan sa medical results nasayran nga may laceration sa kinatawo niini.

Apan tungod higala sa amahan sa bata ang suspetsado wala na lamang mipasaka og kaso.

Sa pikas bahin, human nabaniog ang gihimo sa suspek ngadto sa tres anyos nga silingan niini nasayran sa Superbalita ug Radyo Arangkada nga milangyaw ang kapikas niini tungod sa kauwaw.

Ang step-daugther niini sa unang bana sa iyang asawa ang subay sa taho mitapon na og puyo ngadto sa iyang kaparyentehan human nakasinati sab sa pagpahimulos ni Desoyo.

Ang step-daugther ni Desoyo sumala pa ginabaklad niya kun maligo.

Ang kasong statutory rape ni Desoyo nakadoket sa criminal case no. 69.062-10. Wala siyay piyansa nga girekomenda sa maong kaso.
Sa pikas bahin misaad sab si Brgy. Kapitan Dioscoro Sampaga Jr., kapitan sa Brgy. Pampanga nga tutukan ang kaso aron sab mahatagan og seguridad ang batan-ong biktima.

Niya, bisan og wala siyay ideya sa kasong rape tungod nahitabo kini atol sa administrasyon ni kanhi kapitan Constantino Tiongko apan mipadayag og suporta si Sampaga nga maningkamot sab ang barangay nga matabangan ang biktima nga makab-ot niini ang hustisya. (Rhona Goc-ong uban ang taho sa dxRA Radyo Arangkada)