3 sikop nameke’g papeles

Tuesday, March 29, 2011

TULO ka mga tawo nga naghimo og mga peke nga dokumento ang nasikop sa mga sakop sa National Bureau of Investigation (NBI) didto sa Claro M. Recto Street, siyudad sa Davao niadtong Lunes.

Nasikop sila Ismael Dela Serna Jr., hamtong ang pangidaron, nagpuyo sa Tigatto, Buhangin District, ug managsuong Alejandro Abella ug Assante Abella, pulos hamtong ang pangidaron ug nagpuyo sa Isla Verde, Barangay 23-C Poblacion, ning siyudad.

Have something to report? Tell us in text, photos or videos.

Mga suspetsado gisikop sa mga otoridad pinaagi sa gahum sa search warrant nga gipaguwa ni Regional Trial Court Branch 16 Judge Emmanuel Carpio niadtong Marso 25, 2011.

Si Dela Serna nasikop sud sa Foot Prints samtang ang managsuong Abella nasikop sud sa Stall No. 10 sa Diaz Mall nga nahimutang sa nahisgutang lugar.

Si NBI director lawyer Max Salvador nagbutyag nga ilang gisikop ang mga
suspetsado human sila nakadawat og reklamo gikan kang Philippine Postal Office director Niña Arcedes.

Ang maong opisyal nagpahibalo nga gipeke ang ilang mga dokumento duha na ka semana ang milabay ug nasayran nga ang naghimo mao ang mga suspek.

Si Salvador nagsulti nga dihang ilang gironda ang pwesto sa mga suspetsado, ilang nakuha ang mga peke nga dokumento sa Land Transportation Franchising and Regulatory Board (LTFRB), NBI Clearance, Comelec Certification, titulo sa yuta, transcript of records ug diploma sa nagkadaiyang eskwelahan.

Ang direktor nanawagan ngadto sa katawhan nga kung magkinahanglan sila og
dokumento sama sa NBI Clearance kinahanglan nga moadto sa ilang buhatan aron di makabaton og problema sa umaabot nga mga adlaw.

Mga suspetsado nagbutyag nga napugos sila paghimo sa maong mga dokumento sanglit mamugos ang ilang mga kustomer nga mopatrabaho kanila og mga peke nga dokumento.

Kasong falsification of public documents ang giatubang karon sa mga suspek kinsa nabilanggo sa detention cell sa NBI Davao Region. (Alger Dura)