Aids Candlelight Memorial, Mayo 15

Wednesday, May 11, 2011

DUNGAN nga masaksihan ang kahayag agi sa siga sa kandila subay sa 28th International Aids Candlelight Memorial karong Mayo 15, ning tuig.

Ang kalihukan usa ka kalibutanhong kalihukan nga nagduso sa HIV-Aids Awareness.

Have something to report? Tell us in text, photos or videos.

Dinhi sa siyudad sa Davao, mga grupong padayong mikampanya kontra HIV-Aids, City Health Office ug uban pa lakip na pipila ka indibiwal ang makiglambigit sa kalihukan.

"We light a candle to remember the people na namatay tungod sa AIDs, we remember them, it is also an awareness campaign nato bout HIV-Aids," sumala ni Dr. Jordana Ramiterre sa City Health Office.

Alas 4:30 sa hapon sa maong adlaw himuon ang misa, dayon isunod ang hamubo nga programa, una ang pagsindi sa mga kandila diha sa Rizal Park ning siyudad.

Ang aktibidad sab karon nga tuig may temang “Touching Lives.”

Subay sab sa website nga www.candlelight.memorial.org ang International AIDS Candlelight Memorial nag-awhag sa gobyerno nga lig-unon niini ang ilang kampanya aron mapalambo pa ang kahimtang sa mga tawo nga nataptan sa maong sakit.

Nasayran nga ang mga community-based organizations sa kapin 115 ka nasud himuon ang kalihukan nga hinumduman ang mga tawong mipanaw tungod sa Aids-related diseases, suportahan kadtong may sakit, ipasabot sa katawhan kun unsa kini nga balatian.

Sumala ni Precy Madula, sa City Health Office (CHO) nga nagapadayon ang ilang information/education campaign labot sa maong hisgutanan.

"Nagapadayon ang among paningkamot nga mapasabot ang publiko nga mahimo silang responsable nga di gyud sila makakuha sa sakit. We educate other people, we let them know nga ang HIV-Aids is fatal, besides gasto sab kini kun kini gyud tutukan sa gobyerno," niya atol sa Club 888 Forum, Miyerkules.

Gilauman nga ang International AIDS Candlelight Memorial magsilbi nga dalan alang sa global health community nga ikampanya ang kausaban, mahatagan og bag-ong tingog ang paningkamot nga pakigbatukan ang HIV/AIDS nga pabiling hulga sa kadaghanan.

Si Eddie M. Batoon, Program Coordinator sa Iwag Dabaw, usa ka grupo sa third-sex ang nagbutyag nga sila sa ilang kabahin nakigtambayayong sab sa lokal nga gobyerno sa kampanya niini nga matudluan ang publiko labot HIV-Aids.

Ni Batoon sila naga-organisa og grupo diha sa komunidad, ginatudluan nila kini labot sa mga hisgutanan paglikay sa sakit, workshop ug training ngadto kanila. (Rhona O. Goc-ong)