Batang gianod nakit-an na

NAKAPLAGAN na sa kapulisan ang 4 anyos nga batang babaye kinsa unang gitahong nag-edad og 5 anyos maanod sa baha niadtong Hunyo 6.

Sa uwahing taho nga nahidangat sa Davao del Sur Provincial Police Office (DDSPPO), gisulti ni Angela Salutan, lumolupyo sa Barangay Balasiao, lungsod sa Kiblawan, Davao del Sur, nga nakit-an sa kilid sa sapa sa silingang Barangay Pocaleel ang bata banda alas 2 sa hapon niadtong Dominggo.

Bisan nadugta ug nanimaho na ang patay'ng lawas sa biktima gihimo gihapon ni Dr. Larry Mamingao, medico-legal sa Kiblawan, ang pag-otopsiya sa lawas sa biktima.

Ang patayng lawas sa bata gidala gilayon didto sa Collado Funeral Homes sa nahisgutang lungsod samtang ginikanan sa biktima gipahibawo na lang sa kapulisan.

Sa pikas bahin, wa pay gipaguwang danyos ang Provincial Risk Reduction Management Council (PDRRMC) sa nahitabong pagbaha sa mga lungsod sa Magsaysay, Matanao ug Hagonoy sa Davao del Sur.

Si PDRRMC chair Roderick Milana, nikanayon nga gihuwat pa gihapon nila ang taho gikan sa lungsod sa Hagonoy aron masuta ang kinatibuk-ang danyos sa tulo ka mga lungsod nga naigo sa kalamidad.

Gidason pa ni Milana nga maghuwat sab ang kagamhanang probinsiyal og rekomendasyon gikan sa mga opisyal sa Magsaysay ug Hagonoy aron mapailawom na kini sa State of Calamity (SOC).

Una nang gipailawom sa SOC ang lungsod sa Matanao sa milabay'ng semana ug gilaumang mosunod karong semanaha ang mga lungsod sa Hagonoy ug Magsaysay human grabeng naigo sa kalamidad. (Orlando B. Dinoy)