Mag-uuma giihaw sa 2 suspek

Wednesday, July 13, 2011

WALA damha sa usa ka mag-uuma nga katapusang panihapon na lang diay niya niadtong Lunes sa gabii human nga giluba sa duha ka wala mailhing suspek didto sa probinsiya sa Cotabato.

Ang biktima mao si Rodolfo Truno, 47, minyo ug molupyo sa Barangay Lower Dado, Alamada, sa maong probinsiya.

Have something to report? Tell us in text, photos or videos.

Sa imbestigasyon gikan sa Cotabato Police Provincial Office (CPPO), nasayran nga nanihapon lang si Truno sa iyang payag duol lang sa iyang uma sa diha nga gisaka siya og duha ka wala mailhing lalaki ug gitabangan og luba sa makadaghang higayon.

Human nga maseguro sa mga suspek nga patay na ang biktima, dali sab silang mibiya sa payag ug wala na masayri kon asa na mipaingon.

Nahibaloan nga nag-inusara lamang si Truno sa iyang payag niadtong orasa gumikan kay ang iyang pamilya tua sa ilang panimalay sa Barangay Poblacion sa maong lungsod.

Gisusi na sa kapulisan ang gidangatan sa biktima ug naglaum nga mahatagan kini og kasulbaran sa madali nga panahon.