Nanglaba nakuryentihan

Wednesday, July 13, 2011

USA ka babaye ang nakuryentihan patay samtang nanglaba niadtong Lunes sa buntag.

Ang biktima naila nga si Gigi Apud, 44, minyo ug molupyo sa Barangay Upper Glad 1, Midsayap, North Cotabato.

Have something to report? Tell us in text, photos or videos.

Nasayran gikan sa taho sa Cotabato Police Provincial Office (CPP0) alas 8 sa buntag, nanglaba matud pa si Apud duol lang sa ilang bay.

Apan sa dihang gisugdan na niya og sampay ang iyang mga nilabhang sinina, wala niya mabantayi nga ang sampayan duna diay nakasangyad nga buhing kuryente sa Cotabato Electric Cooperative hinungdan nga nakuryentihan siya.

Tungod sa kakusog sa boltahe sa kuryente sa Cotelco, nasunog ang lawas ni Apud nga maoy hinungdan sa iyang hinanaling kamatayon.

Gisulayan pa unta og tabang sa silingan nga si Bienvenido Martinez ang biktima apan naapil sab siya sa pagkakuryente. Maayo na lang kay di grabe ang iyang naangkon nga sunog sa lawas ug gihatud sa iyang mga paryente didto sa Amado Diaz Foundation Hospital (ADFH) diin luwas na siya sa makuyaw nga kahimtang.

Naghangyo karon og tabang ang pamilya ni Apud nga tabangan sila sa Cotelco sa galastuhan sa ospital ug pagpalubong sa biktima.