Giulan og 'ice'

Thursday, July 14, 2011

NAKURAT ang katawhan sa usa ka barangay sa probinsiya sa Cotabato human makasinati og pag-ulan og yelo alas 4 sa hapon niadtong Miyerkules.

Gibutyag ni Crispiniano Sayago, mag-uuma ug molupyo sa Barangay Guangan, Makilala, nga dungan sa makusog nga hangin, kalit mi-ulan og yelo nga daw kadako sa lusok nga nilubo nga mais.

Have something to report? Tell us in text, photos or videos.

Mga molupyo daling nanagan sud sa ilang mga balay aron nga di maigo sa giulan nga mga yelo.

Dugang ni Sayago nga moabot lamang sa singko minutos ang gidugayon sa pag-ulan og yelo sa ilang barangay nga gikahibudngan sa katawhan kay kini pa ang unang higayon nga nahitabo kini sa ilang dapit.

Nagtuo si Sayago nga dunay dala nga suwerte ang pag-ulan og yelo sa ilang barangay ilabi na ngadto sa mga mag-uuma.

Ang Barangay Guangan nahimutang sa bukiron nga bahin sa utlanan sa Magsaysay Davao del Sur ug Tulunan, North Cotabato.