Ihap sa militar sa Palimbang gikuhaan

Monday, July 25, 2011

GIKUNHURAN na ang gidaghanon sa mga sundalo nga gipakatap didto sa Palimbang, Sultan Kudarat province human mibalik na ang mga bakwet sa ilang mga panimalay niadtong milabay'ng semana.

Gibutyag ni Lt. Col. Adolfo Espuelas, labaw sa 73rd Infantry Batallion sa Philippine Army nga gikuhaan og kapin 60 ang ihap sa mga sundalo nga gibutang sa maong dapit.

Have something to report? Tell us in text, photos or videos.

Apan gitin-aw ni Espuelas nga dunay nahibilin nga usa ka platoon sa militar aron nga magmonitor sa maong dapit.

Giangkon ni Espuelas nga bisan kon mahimo nang kuhaon ang tanang tropa, apan angayan una nga ipadayon ang pagbantay sa pipila ka mga sundalo aron nga di mabalaka ang mga molupyo.

Milaum si Espuelas nga mawagtang na ang mga kahadlok ug kabalaka sa mga molupyo sa Palimbang human nga mipahawa na ang mga armadong grupo sa Moro Islamic Liberation Front nga buot untang motukod og kampo sa Barangay Kepunget apan gisupak sa uban nilang mga kaubanan.

Apan giklaro ni Espuelas nga wala gihapon sila magkompiyansa kay basin unya og mobalik na sab ang mga rebelde ug subling manghasi.