Seguridad sa Ramadan hugtan

Monday, July 25, 2011

GITIGUM ni Chief Superintendent Felicisimo Khu, labaw sa Directorate of Integrated Police Operations (Dipo) Western Mindanao ug sa Joint Task Force-Kutawato ang tanang operation officers sa kapulisan sa Central Mindanao niadtong Dominggo.

Sa pakighinabi sa Bombo Radyo, gibutyag ni Khu nga ang maong panagtigum gitumong sa pagplano sa seguridad alang sa kasaulogan sa Holy Month sa mga kaigsuonang Muslim nga magsugod sa Hulyo 31.

Have something to report? Tell us in text, photos or videos.

Gitin-aw ni Khu nga dili angay'ng mokompiyansa aron malikayan nga masubli ang nahitabong pagpamomba sa mga dautang elemento sa ilang area of responsibility.

Nanghinaut ang nahisgutang opisyal nga unta magmalinawon, hapsay ug walay kagubot nga matigayon sa tibuok panahon sa Ramadan.

Kahinumdoman nga nanghulga ang grupo ni Kumander Abdul Sabide sa Bangsamoro Islamic Freedom Fighters (BIFF) nga molusad og katag-katag nga pagpamomba sa nagkadaiyang dapit sa Mindanao.

Bag-ohay lamang, sumala pa, mi-gradwar sa pagbansay-bansay sa paghimo og bomba sulod sa Liguasan Marsh ang 15 ka mga babayeng "bomber" sa BIFF nga maoy gitahasan ni Kumander Basit Usman, team leader sa mga local recruit sa teroristang Jemmaah Islamiyah sa ilusad nga pagpamomba isip ilang test mission.

Gumikan niini, gibantayan pag-ayo sa militar ug kapulisan ang mga lugar nga posibling target sa mga terorista ilabi na panahon sa Ramadan.