Hangyo sa MILF gibasura ni Ombra Kato

Sunday, September 18, 2011

GIBASURA ni Kumander Ameril Ombra Kato sa Bangsamoro Islamic Freedom Movement (BIFM) ang hangyo sa Ulama Council nga mobalik siya sa Moro Islamic Liberation Front (MILF).

Matud ni BIFM spokesperson Abu Misry Mama nga wala makauyon si Kato sa tanyag sa MILF nga unang nakigsabot ni Pangulong Benigno Aquino III bahin sa hinabing pangkalinaw sa Mindanao.

Have something to report? Tell us in text, photos or videos.

Nagduda si Kato nga posibleng dunay dautang plano ang MILF kung makahukom siya nga mogawas sa iyang gitaguan didto sa Maguindanao.

Kahinumduman, ang MILF naghatag og duha ka semana nga lugway kang Kato aron mobalik sa grupo sa MILF nga nagsugod niatong Septyembre 12 hangtud 26.

Gipamugos ni Kato nga kung interesado ang MILF nga mobalik siya sa Bangsamoro Islamic Armed Forces (BIAF) mas maayo nga moadto si Chairman Al Haj Murad Ibrahim sa Camp Omar aron manguna sa negosasyon uban sa Ulama Council.

Nabalaka karon ang mga molupyo sa Central Mindanao nga kung mapupos na ang ultimatum sa MILF alang kang Kato posibleng moulbo ang dakong kagubot sa Maguindanao ug North Cotabato.

Hinuon, andam na ang militar ug kapulisan nga ipatuman ang warrant of arrest kung i-deklara na sa MILF nga lost command si Kato.