Asawa gipatay sa bana

Thursday, September 22, 2011

CARMEN, North Cotabato -- Usa ka sundalo ang gidakop sa otoridad human nga gipatay ang iyang asawa ug gilubong duol sa kampo sa militar sa maong probinsiya.

Nakalutan ang patay'ng lawas sa asawa sa sundalo sa maong dapit alas 2 sa hapon niadtong Miyerkules.

Have something to report? Tell us in text, photos or videos.

Nailhan sa kapulisan ang biktima nga mao si Bernadeth Tejing Ampatuan, 37, minyo ug molupyo sa Malita, Davao del Sur.

Gibutyag ni Cotabato Police Provincial Director Cornelio Salinas nga base sa ilang imbestigasyon, nasayran nga niadtong Septyembre 11, 2011 alas 8:00 sa gabii, nag-away ang biktima ug ang iyang bana nga si Private First Class Mariano Ampatuan, nadestino sa 524th Engineering Battalion sa Philippine Army sa Carmen, North Cotabato.

Gumikan sa grabeng panaglalis, wala maka-agwanta ang suspek hinungdan nga gibunalan sa ulo ang biktima gamit ang puthaw.

Sa dihang nakita nga patay na, gilubong ang biktima sa iyang bana duol sa bunkers sa kampo sa 602nd Brigade sa Philippine Army didto sa Barangay Nasipian, Carmen, North Cotabato.

Nangayo'g tabang ang pamilya sa babaye nga gipangulohan ni Board Member Isabelo Masiwel ngadto kang Cotabato Governor Emmylou "Lala" Talinio Mendoza ug kang Senior Superintendent Salinas sa diha nga wala na makauli ang biktima sa Malita human sab nga nakadawat sila og taho nga gipatay siya sa iyang bana.

Sa gihimong imbestigasyon sa kapulisan ug ni 602nd Brigade Commander Colonel Cesar Sedillo, nakompirma nga gipatay ang biktima sa iyang bana ug gilubong sulod sa kampo.

Gibalhog na si Ampatuan sa selda sa Carmen police ug gipasakaan na og kasong pagpatay ngadto sa hukmanan.