4 ka BJMP nga bihag gawasnon na

Sunday, October 9, 2011

MAGPET, North Cotabato - Malipayong gisugat sa ilang pamilya ang upat ka mga sakop sa Bureau of Jail Management Penology (BJMP) human sila gibuhian niadtong Sabado. 

Ang mga bihag gibuhian alas 3:40 sa hapon sa mga Herminio Alfonzo Command sa Front Committee 53 sa New People's Army (NPA) didto sa Sitio Baliti, Barangay Bagumbayan, Magpet.

Have something to report? Tell us in text, photos or videos.

Sila Jail Inspector Erico Llamasares, Jail Inspector Murphy Tudyog, SJO2 Rogelio Begontes ug JO1 Rolando Bajuyo gidawat sa mga sakop sa Sowing the Seeds for Peace in Mindanao nga gipangulohan ni Bishop Felixberto Calang.
 
Misaksi sa maong pagbuhi mao ang kaparian sa North Cotabato ug Kidapawan City, sakop sa media ug mga lokal opisyal nga gipangulohan ni Cotabato Governor Emmylou "Lala" Taliño Mendoza. 

Kahinumduman, mga bihag gikan sa Ozamis City Jail aron ihatud ang pinirisong rebelde sa Davao Penal Colony apan gibabagan sa 200 ka mga NPA didto sa Kitaotao, Bukidnon Hulyo 21, 2011. 

"Mahirap ang pinagdaanan tulad sa paglakad ng maghapon, malamig kasi ang klima sa bundok," pahayag ni Llamasares sa Bombo Radyo. 

"Hindi naman kami sinaktan. Inalagaan nga kami at ibinigay ang mga pangangailangan kaso lang wala kaming komunikasyon sa pamilya," dugang niya. 

Giangkon sa opisyal nga maayo ang ilang pagkaon sanglit duna silay espesyal nga suplay sa pagkaon sa kabukiran sa utlanan sa Bukidnon ug Cotabato. 

Ang upat gipresenta atubangan nila Governor Mendoza, Vice governor Gregorio Ipong, Cotabato Police Provincial Office director Cornelio Salinas, 602nd Brigade commander Colonel Cesar Sedillo ug BJMP Chief General Rosendo Dial didto sa Bishop Palace sa Barangay Balindog, Kidapawan City. 

"Of course, masayang-masaya kami. Ang buong BJMP family ay masaya sa paglaya ng aming mga kasamahan. Ipapa-check-up lang muna sila baka may mga sakit bago ihaharap kay DILG  Secretary Jesse Robredo," matud ni Dial. 

Malipayon sab si Bishop Modesto Villasanta convenor sa Sowing the Seeds for Peace in Mindanao nga gibuhian ang mga bihag sa NPA. 

Gipamahayag ni Mendoza nga dihang nangayo'g tabang ang pamilya sa mga biktima, iya dayong gisugdan ang negusasyon sa NPA.