Pari gipatay

Monday, October 17, 2011

ARAKAN, North Cotabato -- Patay ang usa ka Italyanong pari human gipusil alas 7:30 sa buntag kagahapon.

Nailhan sa kapulisan ang pari nga si Fr. Fausto Tentorio, parish priest sa Mother of Perpetual Help sa Arakan, North Cotabato.

Have something to report? Tell us in text, photos or videos.

Si Tentorio miyembro sa kongregasyon sa Pontifical Institute for Foreign Missions (PIME).

Sa nakuhang taho gikan sa Cotabato Police Provincial Office (CPPO), nasayran nga nanaug si Tentorio sa iyang kombento aron lantawon ang iyang sakyanan sa garahe.

Sa paggawas sa pari, dunay duha ka wala mailhing lalaki ang miduol kaniya ug way daghang istorya gipusil siya gamit ang kalibre .45 nga pistola.

Dali sab nga nakasibat ang mga suspek human mahimo ang ilang tuyo pinaagi sa pagsakay og motorsiklo nga way plaka paingon sa wala matino nga direksiyon.

Gidali sa pagdala si Tentorio sud sa simbahan una pa gihatud sa Arakan District Hospital.

Ang biktima gideklara sa nag-atiman kaniya nga mga doktor nga patay na paghiabot sa tambalan gumikan sa grabeng samad nga iyang nahiaguman sa dughan ug kilid nga bahin sa lawas.

Gikanayon sa mga sibilyan nga kalit kaayo ang hitabo kay bisan sila wala makaila sa mga namusil sa pari gumikan kay pulos sila nakasul-ob og helmet.

Gilayong gimando ni Cotabato Governor Emmylou Talinio-Mendoza nga himuon ang higpit nga imbestigasyon sa kamatayon sa pari.

Gisuta na karon sa kapulisan kon kinsa ang mga suspek nga nagpusil pari ug unsa ang ilang hinungdan kon nganong gipatay ang biktima.