Lotto outlet nagpataya'g Last 2 gironda sa pulis

DAVAO DEL SUR - Nabulgar sa sa Criminal Investigation and Detection Group (CIDG) nga gisagulan og illegal nga sugal nga Last 2 ang usa ka Lotto outlet sa Philippine Charity Sweepstakes (PCSO) didto sa lungsod sa Malita niadtong Miyerkules.

Si CIDG provincial director Police Senior Inspector Francis Sonza nagbutyag nga ilang nadakpan sila si Arcenet Estrada, 32, dalaga, nagpuyo sa Barangay Poblacion ug Rosalita Palaruan, 23, nagpuyo sa Barangay Bolila, pulos sakop sa Malita.

Suma ni Sonza nga ilang gironda ang maong lotto outlet alas 7:20 sa gabii pinaagi sa pagpusta sa sugal nga Last 2 sa Lotto outlet nga nakarehistro sa pangalan ni Henry Uyanguren Seng.

Si Police Officer 1 (PO1) Romerillo Borja Jr.ug PO1 John Lowell Camilo sa Malita Police Station maoy nagtakuban nga tayador pinaagi sa pagtaya sa kantidad nga P20.

Human nakumpirma sa CIDG nga dunay Last 2 ang maong outlet ila dayong gisikop ang duha ka mga personahe.

Gikumpiska sa mga sakop sa CIDG ang koleksyon nga nagkantidad og P1,224.00 gikan sa kamot sa mga suspek apil ang gipaon nga salaping papel.

Gipasaka dayon sa CIDG ang kasong illegal gambling batok sa mga dinakpan nga kasamtangan anaa sa ilang kustudiya. (Orlando Dinoy)