3 sundalo gibanhigan, 1 naulo patay sa NPA

Friday, November 11, 2011

NORTH COTABATO -- Usa ka sundalo ang namatay sa pagpamanhig sa mga miyembro sa New People's Army (NPA) alas 6:00 kagahapon sa buntag didto sa lungsod sa Makilala.

Namatay mao si Private First Class Alex Calon nga sakop sa Charlie Company sa 57th Infantry Battalion sa Philippine Army.

Have something to report? Tell us in text, photos or videos.

Gibutyag ni Colonel Prudencio Asto, hepe sa Public Affairs Office sa 6th Infantry Division sa Philippine Army, nga nahitabo ang pagpamanhig sa Purok 4, lungsod sa Makilala.

Matud ni Asto nga naglakaw ang biktima kauban ang laing duha mga sundalo paingon sa ilang headquarters gikan sa ilang company detachment sa Barangay Batasan.

Nasayran nga gibanhigan ang mga biktima sa wa masayri nga gidaghanon sa mga rebelde nga nagpahipi daplin sa dalan.

Nakasukol ang mga biktima pinaagi sa pagpabuto sa ilang mga armas hinungdan nga nahitabo ang pinusilay.

Misibog ang mga rebelde dihang nagsingabot ang mga sakop sa 57th Infantry Battalion nga Colonel Joven Gonzales.

Sa pagsuwat ning balita, padayon ang hot pursuit operation sa military batok sa mga NPA.