Midwife gipusil

Wednesday, November 16, 2011

BAGUMBAYAN, Sultan Kudarat -- Patay ang usa ka midwife sa barangay sa dihang gibanhigan alas 10:20 sa buntag niadtong Martes.

Nailhan sa kapulisan ang biktima nga mao si Elvira Iligan, 25, dalaga, ug molupyo sa Barangay Monteverde, Bagumbayan, sa maong probinsiya.

Have something to report? Tell us in text, photos or videos.

Samdan sab ang drayber sa motorsiklo nga gisakyan sa biktima nga naila nga si Voltaire Felix.

Sa nahagpat nga taho gikan sa Sultan Kudarat Police Provincial Office (SKPPO), nasayran nga sakay si Iligan sa XRM nga motor nga dunay plaka numero ME-3470 gikan sa ilang bay ug paingon na unta sa siyudad sa Tacurong.

Apan kalit ang gipusil ang biktima sa wala mailhing mga armadong lalaki gamit ang kalibre .45 nga pistola.

Nakabsan gilayon sa kinabuhi si Iligan nga nakaangkon og duha ka samad pinusilan sa iyang likod.

Samtang si Felix daling gidala sa mga nakasaksi didto sa Tamondong Hospital sa siyudad sa Tacurong.

Si Felix giingong naa sa malisud nga kahimtang human maigo sa iyang tiyan ug kilid nga bahin sa lawas.

Nagtuo si Sultan Kudarat Governor Suharto "Teng" Mangudadatu nga posibling ang drayber sa motor lang ang tumong sa mga suspek apan napagan ang midwife.

Ang kapulisan sa Bagumbayan, gipangulohan ni Chief Inspector Junie Buenacosa, padayon nga nag-imbestiga sa naasoy nga hitabo.