2 bomba napalgan

Monday, November 21, 2011

BULUAN, Maguindanao -- Gitumong ngadto kang Governor Esmael "Toto" Mangudadatu ang duha ka bomba nga nakaplagan alas 10:00 sa buntag niadtong Dominggo.

Gikanayon ni 6th Infantry Division Public Affairs chief Colonel Prudencio Asto nga nasiplatan sa mga sibilyan ang usa ka gamay nga karton duol sa Buluan District Hospital sa maong lungsod.

Have something to report? Tell us in text, photos or videos.

Sa dihang ilang gihiling, nakurat sila tungod kay bomba ang sulod sa maong karton nga ginama sa duha ka bala sa 60 mm mortar.

Pipila lang ka minutos ang milabay, laing improvised explosive device (IED) ang nakit-an na usab sa mga tawo sa maong dapit nga gama sa usa ka bala sa 81 mm mortar ug gisulod sab og karton nga gibilin kilid sa kalsada nga agian sa convoy ni Mangudadatu paingon sa iyang bay.

Dali nga nagresponde ang 6th Explosive Ordnance Disposal Team sa Philippine Army ug gidepyos ang bomba.

Gibutyag ni Maguindanao PNP Provincial Director Sr. Supt. Marcelo Pintac nga dako ang ilang pagtuo nga gitumong sa bomba mao si Mangudadatu.

Nagduda sab si Mangudadatu nga buot sa mga suspetsado nga mohimo og kaguliyang sa nagsingabot nga ikaduha ka tuig nga anibersaryo sa masaker sa Maguindanao karong Nobyembre 23.

Posible sab nga buot samukon sa mga dautang elemento ang ika-38 nga foundation anniversary sa Maguindanao nga nagsugod niadtong Dominggo ug matapos karong adlawa.

Sa kasamtangan ang kapulisan nagpahugot pa sa ilang pagbantay aron nga di makamugna og kasamok ang mga dautang elemento sa duha ka mga kasaulogan nga nahisgutan. (Edgardo Fuerzas)