Bomba mibuto atol sa paghinumdom sa Maguindanao massacre

Wednesday, November 23, 2011

AMPATUAN, Maguindanao -- Usa ka bomba ang mibusikad duol sa gasoline station sa Barangay Poblacion, Ampatuan alas 7:00 sa buntag kagahapon samtang lima ka mga improvised explosive devices ang nakit-an sa massacre site ug sa merkado publiko sa Buluan, Maguindanao.

Ang pagbusikad nahitabo atol sa paghinumdom sa ika-2 anyos nga anibersaryo sa Maguindanao massacre duol sa Flying V Gasoline Station sa maong barangay.

Have something to report? Tell us in text, photos or videos.

Wa hinuoy gikataho nga naangol o namatay sa maong hitabo. 

Duha ka dagkong klase sa bomba nakaplagan sab sa dalan pasulod sa massacre site sa Sitio Masalay, Barangay Salman alas 5:30 sa buntag kagahapon.

Sa paghinabi sa Bombo Radyo, gibutyag ni Colonel Federico Tutaan, commanding officer sa 46th Infantry Battalion sa Philippine Army, nga ang duha ka IED nakit-an sa mga nagpatrolyang mga sundalo kilid sa kalsada, mga upat ka kilometros gikan sa massacre site.

Dali nga nagresponde ang mga sakop sa 6th Explosive Odnance Disposal Team sa Philippine Army ug gidepyos ang bomba nga ginama sa mga bala sa 105 howitzers cannon.

Nadiskobrehan sab nga dunay usa ka IED gitanum sa kasilyas sa mini gym sa massacre site ug usa didto sa public market sa Buluan.

Lain pang usa ang nakit-an sa national highway nga pasulod sa Ampatuan, utlanan sa Esperanza, Sultan Kudarat Province.

Gihugtan gilayon sa otoridad ang seguridad sa maong mga dapit.

Gi-imbestigahan pag-ayo sa kapulisan sa Maguindanao ang nakaplagan nga mga bomba aron matumbok ang mga responsable niini.

Bisita kagahapon sa komemorasyon sa masaker sa Maguindanao si Local Government Secretary Jesse Robredo, uban si Governor Esmael Mangudadatu, pamilya sa mga biktima ug mga sakop sa media.