Kapulisan, militanteng pundok nakuratan sa bomb drill

HILABIHAN ang kalisang nga gibati sa katawhan dihang ilang nakita ang usa ka bag nga gidudahang bomba ala 1:00 pasado ang takna kagahapon didto sa Rizal Park, siyudad sa Davao.

Ang kadudahang bag daling gipahibalo sa nagpakabanang lungsuranon ngadto sa Central 911, sanglit wa siya masayud nga nga kabahin kadto sa bomb drill nga gihimo sa Task Force Davao.

Human nasayud ang Central 911, daling gipahibalo ang tanang unit sa kapulisan kinsa daling miresponde sa dapit diin gihimo ang bomb drill.

Daw tinuod ang mga aksiyon nga gihimo sa tanang mga otoridad sanglit wa sab sila masayud nga ang maong bag gituyo nga ibutang sa maong dapit.

Mga tawo daling mipalayo sa maong lugar samtang gipasusi ang bag sa mga K-9 dogs sa TF Davao ug Davao City Police Office (DCPO).

Sanglit nasuta nga bomba ang sud sa maong bag, gihimo dayon sa mga eksperto ang water disruption strategy aron di makahimo og dakong kadaut.

Mga pulis nga miresponde sa lugar nagpahayag nga nagtuo silang dunay mga terorista nga nakasulod sa siyudad nga buot maghimo og kagubot atol sa adlaw nga natawhan ni Gat Andres Bonifacio.

"The bomb drill was already scheduled but unannounced ang date at saka area kaya hindi nila alam," pahayag ni TF Davao commander Colonel Rey Leonardo Guerrero dihang gihinabi pinaagi sa telepono sa Radyo Arangkada ug Sun.Star Davao SuperBalita kagahapon.

Si Guerrero nagkanayon nga ilang gituyo nga wa gipahibalo ang bomb drill tungod kay buot nilang madetermina ang kaabtik sa tanan nga mga law enforcement agencies.

"Ginawa namin ito because we want to get the natural reaction of the public and other law enforcement agencies concerned," pasabot ni Guerrero.

Tungod sa nahitabo, nabalda ang kalihukan nga gilusad sa mga militanteng pundok kagahapon didto sa Rizal Park.

"Ang among pangutana sa ahensiya sa gobyerno nga naglusad sa bomb drill, nganong ila mang gihimo dinhi atol sa among activity? Unsa may ilang motibo?" pahayag ni Cherry Orendain, spokesperson sa Anakbayan Party list dihang gihinabi sa SuperBalita.

Mga militanteng pundok nakuratan ug nagyawyaw sanglit una kadtong nahitabo nga dunay nakaplagan nga bomba samtang naglusad sila og lihok protesta.

"Hindi namin alam na may activity ang militant organizations sa Rizal Park. Nagkataon lang talaga," pasabot ni Guerrero.

Ang maong opisyal nagkanayon nga ilang gitumong kagahapon ang bomb drill sanglit way nag-opisina sa City Hall, Sangguniang Panlungsod ug uban pang patigayon sa down town area.

"Sinadya namin na gawin ang bomb drill kanina dahil walang pasok. At nagpapasalamat po kami kasi mataas ang awareness ng civilian at ng ating kapulisan," panapos sa opisyal.