Radyo station manager gipatay sa tambubuan

Thursday, December 1, 2011

KIDAPAWAN CITY -- Patay ang usa ka kanhi manager sa estasyon sa radio human gipahit sa tambubuan alas 6:40 sa buntag niadtong Miyerkules.

Ang namatay giila nga si Domingo Cabanog, 53, minyo, ug kanhi station manager sa 107.1 Radyo Natin sa siyudad sa Kidapawan.

Have something to report? Tell us in text, photos or videos.

Gibutyag sa igsuon nga si Edgar nga nanilhig lang ang biktima likod sa ilang balay didto sa Cotelco Village, Barangay Poblacion, sa diha nga nahitabo ang pagpamahit sa tambubu-an.

Samtang nanilhig si Cabanog, kalit lang siyang gisapdapan sa mga tambubuan nga nagbalay sa usa ka punoan sa kape ug gipahit ang ulo sa biktima.

Dali nga gitabang si Cabanog sa iyang pamilya human nga natumba ug gidala sa Kidapawan Doctors Hospital.

Apan pipila ka minutos ang milabay, gideklara siyang dead on arrival sa mga doktor sa maong ospital.

Dugang ni Edgar nga basi sa gipamahayag sa mga mananambal sa KDH nga asthma ang gikamatyan sa iyang igsuon, dungan sab sa pag-ataki sa sakit sa kasing-kasing.

Ang biktima sa wala pa makabsi sa kinabuhi, nakasulti pa nga gipahit og tambubuan ang iyang ulo mao nga natumba siya sa yuta.

Gikanayon ni Edgar nga posibleng misuol ang sakit sa iyang igsuon atol sa pagpamahit sa tambubuan nga maoy hinungdan sa iyang kamatayon.