Drayber, konduktor gipatay

Tuesday, December 6, 2011

PIGCAWAYAN, North Cotabato -- Duha ang patay sa pagpamusil sulod sa unit sa Weena Bus Company alas 7:15 sa gabii niadtong Lunes.

Ang mga biktima giila nga sila si Rogelio Valdeviezo, drayber sa bus, ug si Adam Fail Ibrahim, konduktor sa bus, nagpuyo sa Toril, siyudad sa Davao.

Have something to report? Tell us in text, photos or videos.

Gikanayon ni Cotabato Police Provincial Director Cornelio Salinas nga misakay ang suspek nga nailhan nga si Melco Lavenia sa Eric 25 Weena Aircon Bus nga nagdala sa plaka MVV-364 duol sa terminal sa Barangay Poblacion, Pigcawayan.

Pag-abot sa Barangay Manuangan sa maong munisipyo, kalit nga mihulbot si Lavenia sa iyang dala nga kalibre .45 nga pistola ug gipusil si Ibrahim nga naigo sa iyang likod. Misulay si Valdeviezo sa pagtabang sa konduktor, hinungdan nga gipikhan sab siya sa suspek.

Patay gilayon ang mga biktima nga nakaangkon og mga samad pinusilan sa nagkadaiyang parte sa lawas. Nahug sab ang bus sa kilid sa kalsada.

Dihang nakit-an sa mga armadong sibilyan, ilang gipalibutan ang bus, resulta nga wala makagawas si Lavenia ug gibihag ang tulo ka mga pasahero gamit ang armas ug granada.

Dali nga miresponde ang Pigcawayan Police Station nga gipangulohan ni Senior Inspector Donald Cabigas, uban ang mga sakop sa 40th Infantry Battalion sa Philippine Army.

Milungtad og usa ka oras ang negusasyon ni Cabigas una mitahan si Lavenia dihang miabot ang iyang higala nga si alyas Pempengco ug mga sakop sa media.

Gibutyag ni Cabigas nga ang suspek usa ka kanhi barangay tanod didto sa Barangay Poblacion 3, Midsayap, North Cotabato, ug dunay personal nga away batok sa konduktor nga si Ibrahim.

Gihikay na sa kapulisan ang pagsang-at og tukmang kaso batok kang Lavenia.