Bayot gipusil, patay
-A A +ASunday, January 29, 2012
MIDSAYAP, North Cotabato - Patay ang usa ka bayot human siya gipusil alas 2 sa kadlawon niadtong Domingo.
Ang biktima naila nga si Samuel Bernal, 36, molupyo sa Purok Santan, Barangay Poblacion 1, Midsayap.
Nasayran gikan kang Midsayap Police Station commander Supt. Franklin Anito nga samtang nagpalit og balot ang biktima kilid sa municipal plaza kalit lang mibutho ang duha ka wala mailhing tawo ug gipusil siya gamit ang kalibre.45 nga pistola.
Patay gilayon si Bernal human naigo sa iyang ulo samtang ang mga mamumuno abtik nga misibat sakay sa XRM nga motorsiklo nga walay plaka paingon sa wala matino nga dapit.
Matud ni Reyno Safra, balut vendor, wala siya makaila sa mga tawo nga namusil sanglit pulos sila nagkalo ug kalit sab kaayo ang hitabo.
Nagduda si Midsayap Municipal Mayor Manuel Rabara nga posibleng personal nga atraso ang motibo sa krimen kay kanhi nalambigit ang biktima sa pagpayuhot og gidiling druga.
Hangtud karon blangko pa ang kapulisan kon kinsa ang mga tawo nga namusil sa biktima. (Edgardo Fuerzas)
Gipatik sa mantalaang SuperBalita Davao Enero 30, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
