Bomba gibilin sa plaza nakit-an

Friday, February 3, 2012

NORTH COTABATO -- Usa ka dakong klase sa bomba ang nakaplagan alas 10:50 sa gabii niadtong Huwebes didto sa lungsod sa Midsayap.

Gibutyag ni Midsayap Police Station commander Police Superintendent Franklin Anito nga nasiplatan ang bomba sa mga sibilyan nga nangaon duol sa usa ka barbecue stand kilid sa Municipal Plaza sa Barangay Poblacion 3, Midsayap.

Have something to report? Tell us in text, photos or videos.

Ang karton gisusi sa mga sibilyan, apan sa dihang ilang giablihan, maoy misugat sa ilang panan-aw ang bomba.

Daling gipahibalo ang kapulisan hinungdan nga nahiabot dayon ang 66th Explosive Ordnance Disposal Team sa Philippine Army nga gipangulohan ni Staff Sargeant Joseph Salahid.

Gipabuto na ang bomba nga hinimo sa usa ka bala sa 60 mm mortar nga dunay 3310 Nokia Cellphone isip trigerring mechanism.

Dako ang pagtuo ni Mayor Manuel Rabara nga posibleng hinimoan sa mga terorista ang pagbutang og bomba duol sa mga barbecue stand kilid sa municipal plaza nga daghang tawo panahon sa kagabhion.

Gipahugtan karon sa kapulisan ang seguridad sa Midsayap gumikan sa hulgang pagpamomba. (Edgardo Fuerzas)