Mangandam aron malikayan ang kamatayon: Pagasa

Thursday, February 9, 2012

PAGPANGANDAM kanunay ang yawe aron malikayan ang kamatayon bunga sa mga kalamidad nga mahitabo sa rehiyon.

Kini ang pahinumdum ni Gerry Pedrico, hepe sa Philippine Atmospheric, Geophysical Astronomical Services Administration (Pagasa)-Davao.

Have something to report? Tell us in text, photos or videos.

"Signal number 1 pa lang, ayaw lang pagkampante diha, mangandam ng daan aron safe ang pamilya kay ang panahon nato pausab-usab kaayo," sumala sa opisyal atol sa Club 888 Forum.

Gihimo nga ehemplo ni Pedrico ang panahon dinhi sa siyudad, maayo ang lakat niini sa buntag, apan sa kalit lang modaug-um sa hapon, mobunok ang kusog nga ulan.

Niya, paspas ang pag-usab-usab sa dagan sa panahon, nga gilantaw nga epekto sab sa climate change.

Gidugang sa opisyal nga sama sa nahitabo sa Cagayan de Oro City ug Iligan nga grabeng nadaut ni bagyong Sendong.

Isplikar ni Pedrico, ang bag-ong Sendong usa lamang ka tropical storm, di kaayo kusog, apan wa damha ang halapad nga kadaut nga dala niini.

Sa kasamtangan, anaa na sa La Nina phenomenon ang rehiyon, diin gilaumang mobalik sa normal ang panahon pag-abot sa Marso o Mayo.

"Ang March ug April nato dinhi is init tungod summer, pero dili gihapon ta kasulti kun init ba na o dili tungod ang weather mousab-usab gyud siya," sumala sa Pagasa Davao Chief. (Rhona O. Goc-ong)