MILF naitok kang Misuari

Thursday, February 9, 2012

COTABATO CITY -- Mipalag ang Moro Islamic Liberation Front (MILF) ngadto kang Moro National Liberation Front (MNLF) founding chairman Nur Misuari sa mga masakit nga akusasyon sa opisyal.

Unang giakusahan ni Misuari ang MILF nga dili na lig-on ang puwersa ug wala nay kusog nga makigsangka sa armadong kusog sa gobyerno.

Have something to report? Tell us in text, photos or videos.

Matud ni Misuari nga nagkatibulaag na ang mga opisyal ug miyembro sa MILF, ang uban nila nagpasakop na sa MNLF.

Suma ni MILF Deputy Information Officer Calid Musa nga dakong sayop ang giluwatang pahayag ni Misuari nga maoy magsugnod sa pagkatibulaag sa Bangsamoro sa Mindanao.

Gibatikos sab ni Misuari ang mga miyembro sa International Monitoring Team (IMT) nga gikan sa nasud Malaysia sanglit duna silay dakong interes sa Sabah claim.

Nasuko sab ang mga opisyal sa Central Committee sa MILF sa akusasyon ni Misuari kinsa naglantaw lamang sa iyang kaugalingong interes ug dili sa interes sa katawhang Moro.

Ubay-ubay na ang mga sakop sa MNLF gikan Jolo Sulu, Tawi-Tawi, Basilan, Maguindanao ug Lanao del Sur ang nagpasakop sa MILF gumikan wala na sila makauyon sa baba ni Misuari. (Edgardo Fuerzas)