Nagpatay sa saleslady nadakpan, gidemanda

Thursday, February 9, 2012

DAVAO DEL NORTE -- Gipasakaan na og kaso ang usa ka drayber sa pedicab kinsa maoy gitudlo nga nagpatay sa saleslady sa Gaisano Mall niadtong Pebrero 4 sa gabii.

Nadakpan ang suspek human gitudlo sa mga testigo alas 5 sa hapon kagahapon.

Have something to report? Tell us in text, photos or videos.

Kini maoy nasayran gikan kang Police Superintendent Juel Neil Salcedo, hepe sa Tagum City Police Station (TCPS), sa paghinabi kaniya sa SuperBalita kagahapong adlawa.

Ang nag-atubang og kasong murder mao si Norman Conchas, 22, minyo, molupyo sa Purok B, Suaybaguio District, Barangay Magugpo North, Tagum City.

Si Conchas positibong gitudlo sa mga testigo nga maoy nagpatay pinaagi sa pagbunal sa adjustable wrench makaduha ka higayon sa nawong ug ulo sa biktima nga si Sandee Ann Hingco, 19, dalaga, molupyo sa Purok 6, La Concepcion, Barangay La Filipina, Tagum City.

Si Hingco gitahong gikan sa iyang trabaho sa mall. Sa wala pa siya miuli, miadto siya sa Trade Center kay mopalit og pagkaon dayong misakay og pedicab nga gimaneho sa suspek.

Imbis nga mopaingon sa Barangay La Filipina, gidiretso sa suspek ang pedicab sa dalang Ferido sa Mankilam kon diin nahitabo ang krimen alas 10:46 sa gabii niadtong Pebrero 4.

Nagtuo ang mga otoridad nga luguson unta ang saleslady apan misukol siya pinaagi sa pagkawras sa nawong sa suspek kinsa nasuko pag-ayo nga miresulta sa pagbunal kaniya og adjustable wrench.

Base sa imbestigasyon sa kapulisan, ang mga molupyo sa maong dapit nakadungog sa siyagit sa biktima nga nangayo og panabang ug nakita ang nipalayo nga pedicab kon diin nakuha ang body number niini.

Sa dihang gisubay, nasayran nga ang pedicab nga dunay plaka numero QR 7568 ug body number 0564 gipanag-iyahan sa usa ka Marifel Apuya kinsang drayber mao si Conchas.

Ang suspek gikostudiya karon sa selda sa TCPS samtang maghuwat sa pagtaral sa iyang kaso. (Teddy Cabana)