Ordinansa paamendahan

Thursday, February 9, 2012

GIDUSO sa Sangguniang Panlungsod atol sa regular sesyon niadtong Martes sa unang pagbasa ang resolusyon nga mag-amenda sa ordinansa nga nagkinahanglan nga dunay health certificate ang mga empleyado sa siyudad sa Davao.

Si Konsehal Bernard Al-ag, chairperson sa committee on health, nagbutyag sa iyang privilege speech nga kinahanglan amendahan ang City Ordinance 078 nga nailang Environmental Health and Sanitation Ordinance of Davao City.

Have something to report? Tell us in text, photos or videos.

Tumong niini nga masulbad ang pagdasok sa mga tawo sa City Health Office (CHO) diin i-renew ang ilang mga health IDs sa buwan sa Enero.

"Why does this problem keep on recurring? Is there a problem in the current system and most importantly, what can we do to alleviate the same?" pangutana ni Al-ag.

Ang konsehal nagkanayon nga nakadawat siya og reklamo bahin sa maong suliran nga namantala sa mga mantalaan sa miaging buwan.

Ang Section 3.1 sa ordinansa nagmando nga ang health ID balido lamang kini sa katapusan petsa sa tuig, mao nga bisan gikuha ang ID sa buwan sa Disyembre, kinahanglan nga mokuha na sab siya sa buwan sa Enero.

Giingon ni Al-ag nga di maatiman dayon sa CHO ang mga empleyado nga mokuha og ID sa buwan sa Enero busa kinahanglan nga amendahan ang maong ordinansa. (Jereco O. Paloma)