Rody di uyon ideklarang 'persona non grata' naglapa sa pawikan

Thursday, February 9, 2012

GIBUTYAG ni Vice Mayor Rodrigo Duterte nga di maayo nga ideklarang “persona non grata” ang mga langyaw nga maoy hangyo ni Mayor Sara Duterte.

Sa iyang senemanang programa sa telebisyon “Ato ni Bay” niadtong Martes, ang bise mayor nagbutyag nga di makatarunganon nga ideklarang “persona non grata” ang tripulante sa MV Hannah II sanglit maayo ang ilang katuyuan sa pagbisita dinhi sa siyudad.

Have something to report? Tell us in text, photos or videos.

Suma sa bise mayor nga ang tag-iya sa barko nangayo na og pasaylo ngadto sa mga Dabawenyo ug alang niya husto na kini.

"I would just accept the apology. Personally, my sense is that an apology would be enough. Ayaw ko'g pangutan-a ngano, di ko musugot i-declare sila persona non grata, in deference to the mayor. Di na sila kabalik pag-i-declare sila persona non grata. They were here in goodwill," pahayag ni Duterte.

Niadtong miaging semana, giawhag ni Mayor Sara Duterte ang konseho nga ideklara ang tripulante lakip na mga misyonaryong Indonesian nga “persona non grata” human sila nasakpan nga naglabay sa parte sa ilang giihaw nga pawikan sa basurahan sa Sta. Ana Wharf.

Gipasabot ni Hannah Parks, tag-iya sa barko, nga ilang gilabay ang parte sa pawikan sa basurahan sanglit di sila buot nga ilabay kini sa dagat.

Ang pawikan gihatag kanila sa presidente sa Republic of Palau atol sa ilang pagbisita didto sa maong nasud niadtong miaging tuig.

Ang Republic of Korea, Palau, ug Indonesia, uban ang Pilipinas, apil sa 175 ka mga nasud nga mipirma sa kasabutan nga panalipdan ang mga nagkahanaw nga pawikan. (Ben O. Tesiorna)