Terminal sa Digos City ‘dili luwas’

Thursday, February 9, 2012

DIGOS CITY -- Giangkon sa Digos City Police Office (DCPO) nga delikado karon ang seguridad sa Digos City Overland Transport Terminal.

Si Police Superintendent Solomon de Castilla, hepe sa DCPO, nagbutyag sa Sun.Star Davao SuperBalita nga bisan og naka-deploy ang ubang sakop sa kapulisan, apan dili gihapon luwas ang pampublikong terminal sa mga dautang elemento.

Have something to report? Tell us in text, photos or videos.

"Naa tay mga pulis nga nagbantay pero tungod kay abri ang palibot niini mao mga delikado gihapon," ni de Castilla.

Matud sa hepe nga naningkamot silang maluwas batok sa mga hulgang pagpamomba ang terminal, apan tungod kay bisan asa lang moagi ang mga pasahero mao nga di gihapon masigurong luwas kini.

"Naglisud ta karon kay naa diha kining bagsakan (abtanan sa mga fish car) nga daghan og agianan sa mga pasahero," asoy sa hepe.

Tungod niini, nangita og paagi ang kapulisan nga masulbad ang suliran aron magpabiling luwas ang terminal.

Giawhag sa opisyal ang katawhan nga motabang pagbantay sa palibot ug itaho dayon kon dunay mga kadudahang tawo ug bagahe palibot sa terminal. (Orlando B. Dinoy)