Bata nga gipatay giila sa ginikanan

Friday, February 10, 2012

KIDAPAWAN CITY -- Nailhan na ang bata nga gipatay alas 9 sa gabii niadtong Martes didto sa Barangay Pag-asa, M'lang, North Cotabato.

Mismo ang ginikanan sa biktima ang nag-ila kaniya nga mao si Jerald Agustin, 13, Grade 5 sa La-Libertad Elementary School sa Barangay La Libertad, Makilala.

Have something to report? Tell us in text, photos or videos.

Kahinumdoman nga nakit-an ang patay nga lawas sa bata kilid sa kalsada sa Barangay Pag-asa. Ang bata naka-angkon og daghang mga samad pinusilan sa nagkadaiyang bahin sa lawas ug gigapos ang tiil ug kamot ug gibaatan ang baba.

Gibutyag ni Emil Agustin nga milakaw ang iyang anak niadtong unang semana sa Disyembre 2011 aron nga mangita og trabaho.

Sukad niadto, wala na mibalik ang biktima ug wala na sab sila nakadawat og balita kung asa na siya.

Dako na lang ang ilang kakurat sa diha nga nakaplagan ang bata nga wa nay kinabuhi.

Dako sab ang pagtuo ni Mayor Lito Pinol nga posibling dautang grupo ang nasudlan sa biktima hinungdan nga siya gipatay.

Sa kasamtangan, ang kapulisan padayon nga nagsusi sa hitabo aron mailhan ang mga tawo nga dunay kalabutan sa pagpatay sa bata. (Edgardo Fuerzas)