Pekeng P500 gibayad sa lodging house

Friday, February 10, 2012

DAVAO DEL NORTE -- Usa ka tag-iya sa lodging house sa Tagum City nabiktima sa peke nga kuwarta.

Si Joe Edig, tag-iya sa Rider's Inn ug molupyo sa Barangay Canocotan, dali nga nagpahibalo sa Tagum City Police Station (TCPS) human nga madiskobrehi nga ang gibayad nga P500 sa magtiayon nga kustomer alas 10 sa gabii niadtong Huwebes peke diay.

Have something to report? Tell us in text, photos or videos.

Gisaysay ni Edig sa kapulisan nga iyang nasayran nga ang kuwartang papel nga P500, dunay serial number CH018625, peke sa dihang iyang gisugo ang iyang sakop nga pasensilyohan kini sa tindahan.

Kini human nga wala dawata kay sumala pa peke nga kuwarta.

"Pagbalik sa akong sakop, siya misulti nga dili dawaton kay lagi peke ang P500 mao nang ako dayong gi-report sa PNP ug gisultihan ko nga ipakompirma sa bangko," tin-aw ni Edig.

Dugang ni Edig nga mga personahe sa PSBank-Tagum Branch mikompirma gayud nga peke ang maong P500 rason nga iyang gikabalak-an nga basin daghan pang mga peke nga kuwarta ang mikatag sa dakbayan.

Giangkon sa tag-iya sa lodging house nga wala mamay-ungi sa iyang cashier nga si Gaga Ibanez ang hitsura sa magtiayong kustomer.

Tungod sa maong hitabo, nagplano si Edig nga mopalit na og money detector aron nga magamit sa pagsusi sa kuwartang ibayad sa ilang lodging house aron nga di mailad. (Teddy Cabana)