Tulisan nasikop

Friday, February 10, 2012

USA ka tulisan ang nasikop sa kapulisan sa Tugbok Police Station didto sa Barangay Mintal, syudad sa Davao.

Nasikop alas 10:30 sa gabii niadtong Huwebes si Arnold Sasi Pelares, 21, ulitawo ug nagpuyo sa Miracle Crusade, Sitio Basak, Barangay Mintal, distrito sa Tugbok.

Have something to report? Tell us in text, photos or videos.

Sa inisyal nga imbestigasyon sa kapulisan, gitulis ni Pelares sila si Rachel Sigua Napatotan, 18, dalaga, taga Palmera Street, Purok 3, Barangay Sto. Nino; ug Ailyn Nueva Bedra, 25, dalaga, taga Azusena Street, Astro Compound, Barangay Mintal niadtong Huwebes.

Mga biktima nagbutyag nga samtang naglakaw lamang sila sa Azusena Street, kalit silang gihunungan sa Honda XRM 125 nga dunay plate number 6684-YT nga gisakyan sa duha ka mga lalaki.

Suma sa mga biktima, gitionan sila og wa matino nga kalibre sa armas sa angkas sa motorsiklo dayon mideklara nga hold-up.

Gikuha sa mga suspek ang shoulder bag ni Napatotan nga dunay sud nga Sanyo Digital Camera nga nagkantidad og P6,000 ug mga ATM cards.

Daling misibat ang mga tulisan human nakuha ang ilang tuyo padulong sa wala matino nga direksyon.

Sa gihimong follow-up operation sa kapulisan, nadakpan ang suspek didto sa Mintal Proper human sila positibong giila sa mga biktima.

Napriso karon ang suspek sa Tugbok Police Station samtang giandam na ang kaso sa kapulisan.