2 lalaki gipatay

Saturday, February 11, 2012

DAVAO DEL NORTE -- Duha ka mga insidente sa pagpamatay ang nahitabo sa managlahi nga barangay sa lungsod sa B.E. Dujali niadtong Huwebes ug Biyernes.

Unang insidente nahitabo didto sa Purok Ipil-ipil, Barangay Magumpising kon diin ang biktima gipusil ug gituohang gisalbids alas 10 sa gabii niadtong Huwebes.

Have something to report? Tell us in text, photos or videos.

Ang wala mailhing biktima gihigtan nga binaklid ang kamot ug ang mga tiil gihiktan og masking tape ug tie box ug ang baba gibaatan sab og masking tape.

Napalgan ang biktima sa mga molupyo nga nagbuy-od na lang nga way kinabuhi sa maong dapit nga dunay daghang samad pinusilan sa iyang ulo.

Nakuha sa kapulisan sa nahitaboan ang siyam ka basiyo sa bala sa kalibre .45 nga pistola.

Ang patay'ng lawas sa biktima gidala na sa Padilla Funeral Homes sa Tagum City.

Ikaduhang gipatay mao ang usa ka batan-on nga gihansakan og kutsilyo ala 1 sa kaadlawon niadtong Biyernes.

Ang biktima giila nga si Mateo Baco, minyo, molupyo sa District 4, Barangay Tanglaw, B.E. Dujali nga nakahiagum og daghang samad sa dughan nga miresulta sa iyang kamatayon.

Sa imbestigasyon ni SPO1 Dario Nabuya, nasayran nga ang biktima gikan nag-inom sa videokehan sa Poblacion Dujali ug sa dihang mipauli na uban ang iyang mga higala, giatngan og duha ka mga suspetsado nga sakay og motorsiklo.

Angkas sa motor ang mikanaug ug miluba sa makadaghang higayon sa biktima.

Daling misibat ang mga suspetsado sa wala matino nga lugar samtang ang patay'ng lawas ni Baco gidala sa Buyo Funeral Homes sa maong lungsod.

Motibo ug pag-ila sa mga midunggab ni Baco padayon pang gisubay sa kapulisan. (Teddy Cabana)