5 ekipo gisunog sa NPA

Saturday, February 11, 2012

KIDAPAWAN CITY -- Gisunog sa gituohang sakop sa mga rebeldeng New People's Army (NPA) ang mga heavy equipments sa usa ka construction firm alas 11 sa buntag niadtong Biyernes.

Matud ni Mayor Rodolfo Gantuangco nga kalit lang mibutho ang lima ka wala mailhing tawo sa giparkingan sa mga heavy equipment sa Ricardo Construction Incorporated sa Barangay San Roque, Kidapawan City.

Have something to report? Tell us in text, photos or videos.

Ang maong mga dagkong ekipo gigamit sa pag-ayo sa Cotabato-Davao Highway.

Mga armado nagbubo og gasolina sa tulo ka mga dump truck, usa ka backhoe ug usa ka payloader ug gidauban.

Dali sab nga misibat ang mga armadong rebelde sa dihang nakita nga gilamoy na sa kalayo ang mga ekipo sakay sa tulo ka motorsiklo nga way plaka.

Walay nahimo ang mga sibilyan ug empleyado sa RCI gumikan kay armado og M16 Armalite rifles ang mga rebelde.

Nagtuo si Gantuangco nga pangikil ang motibo sa naasoy nga hitabo gumikan kay dunay nadawat nga extortion letter ang RCI gikan sa nagpailang NPA apan wala nila tagda.

Sa inisyal nga imbestigasyon sa kapulisan moabot ngadto sa P10 milyones ang danyos sa pagsunog sa lima ka mga heavy equipments. (Edgardo Fuerzas)