Naghantak giluthang

Saturday, February 11, 2012

PATAY ang usa ka 47 anyos nga lalaki human gipusil sa wala mailhing mamumuno didto sa Amakan, Purok 10, Doña Salud, Sasa, siyudad sa Davao samtang nagdula og hantak.

Nahitabo ang insidente alas 6:30 sa gabii niadtong Biyernes nga gikamatay sa biktima nga si Leo Jumalon Maluya, 47, minyo, walay trabaho ug molupyo sa maong lugar.

Have something to report? Tell us in text, photos or videos.

Sa imbestigasyon nga gilusad ni SPO4 Jerry Pichon sa Sasa Police Station, nasayran nga nagdula og hantak ang biktima sa naasoy'ng lugar sa dihang kalit nga giduol sa usa ka wala mailhing lalaki ug gipusil sa likod nga bahin sa lawas.

Sumala pa nga milapos ang bala sa wala matinong kalibre sa pistola sa iyang dughan nga maoy hinungdan sa hinanali nga kamatayon sa biktima.

Nagtuo ang kapulisan nga atraso ang hinungdan sa pagpusil patay sa biktima.

Gidala gilayon ang patay'ng lawas sa biktima sa Rivera Funeral Homes sa Sasa aron ipailawom sa otopsiya.

Samtang ang mga imbestigador sa Sasa PNP naghimo na og dugang imbestigasyon aron nga mailhan ug madakpan ang mamumuno.