48 ektarya sagingan naigo sa 'ipu-ipo'

Sunday, February 12, 2012

DAVAO DEL NORTE -- Kapin 48 ektaryang plantasyon sa saging ang nadaut human naigo sa ipu-ipo didto sa Barangay Tiburcia ug Barangay Sampao, lungsod sa Kapalong.

Si Tiburcia barangay captain Gil Gundaya nagsulti sa Sun.Star SuperBalita nga nahitabo ang ipu-ipo alas 3:00 sa hapon niadtong Disyembre 22, 2011.

Have something to report? Tell us in text, photos or videos.

Matud ni Gundaya nga nagsugod ang ipo-ipo sa sapa sa Libuganon ug mituyok sa plantasyon sa saging didto sa Tiburcia dayon milahus sa Barangay Sampao.

Sa ilang gihimong pakisusi, 48 ka ektaryang sagingan ang nadaut, pito ka ektarya niini gipanag-iyahan sa asawa sa kapitan samtang ang uban gipanag-iyahan sa pamilyang Baldueza, Bumatay, Latayan ug Venoya.

Tungod sa maong hitabo, suma sa kapitan, nagkautang-utang sila aron dunay ikasuweldo sa ilang mga trabahante.

"Maayo unta kaayo ang presyo karon kay mahal ang saging, ang problema lang kay tingbayad na sab og buhis unya naigo pa gyud sa ipu-ipo among sagingan," sulti ni Gundaya.

Mga apektadong mag-uuma naghangyo karon sa mga opisyales sa lungsod nga hatagan sila og exemption sa mga balayrunon sa buhis.

Naghangyo sab sila nga tabangan sa gobyerno aron makabangon sa grabeng kadaut tungod sa ipu-ipo. (Teddy Cabana)