Duterte miangkon lisud sulbaron ang baha

Sunday, February 12, 2012

GIANGKON ni Davao City Vice Mayor Rody Duterte nga di daling masulbad ang suliran sa pagbaha dinhi sa siyudad.

"Wala may excuse, wala nay mahimo. Gihimo na nato ang tanan to repair the drainage. Ang drainage nato ubos man gyud," ni Duterte sa programang “Gikan sa Masa Para sa Masa”.

Have something to report? Tell us in text, photos or videos.

Sumala sa bise mayor, kon mohimo gyud og solusyon alang sa pagbaha dinhi, manginahanglan kini og minilyon nga pundo aron ipalit og luna asa ibutang ang dagkong kanal.

Gipunting sab ni Duterte kadtong mga establistamento nga wala mituman sa protocol nga ilang gitabunan ang kanal nga gipasulbad niya sa City Engineer's Office (CEO).

Gidugang sa bise mayor matag panahon nga mobunok ang ulan, matungnan pa nga taub ang dagat di gyud dayon moubos ang tubig-baha.

"Basta matungnan ta og high-tide, motabla na gyud. Di man mosaka ang tubig apan mo-level gyud siya di dayon kagawas."

Misugyot sab ang bise mayor ngadto sa lokal nga gobyerno nga mopalit og dugang lima ka vactors aron motabang sa pagsupsop sa baradong kanal sa siyudad.

Sa nakalabay nga semana, natapos ang gihimong assessment sa Urban Drainage Systems Specialist Maarten Vierhout gikan NetherLands sa drainage plan sa siyudad.

Gibutyag sa langyaw nga workable pa ang plano, ipatuman lamang ang ubang interbensiyon nga nakalatid niini.

Gisulti sab ni Vierhout nga dawaton na lamang gyud sa kadaghanan o mga nanimuyo dinhi sa siyudad ang mga pagbaha, tungod ang Davao naka-plastar sa flood-plain area. (Rhona O. Goc-ong)